"Piztu Telebista Express", astelehenetik ostegunera, ETB1en eta eitb.eus-en

Zer gertatzen da telebistak zu ikusten zaituenean?

Galdera horri erantzuteko aukera ematen digu astero Euskal Telebistako "Piztu Telebista" saioak eta, aurrerantzean, baita egunero ere. Izan ere, "Piztu Telebista Express" emanaldia eskainiko da astelehenetik ostegunera, 21:15ean, ETB1en eta eitb.eus-en. 15 minutuko tarte laburra izango da, "Zurekin Bat" lehiaketaren aurretik.

Euskal Herriko hainbat familia, bikote eta lagunen etxeetako egongeletan sartzen da "Piztu Telebista", eta telebista nola ikusten duten erakusten digu. Etxe horietako bakoitzean saio berdinak ematen zaizkie ikustera, eta programa horien aurrean esaten dituztenak ikusi eta entzuten ditugu guk: komentarioak, erreakzioak, iritziak, eztabaidak, barre algarak…

Albiste, erreportaje, lehiaketa, dokumental, kirol saio, telesail, reality edo telebista magazinak jarri ohi dizkiete, denei eduki bera; eta egongelan gertatzen dena freskotasunez eta naturaltasunez jasotzen da. Erresuma Batuko Channel 4 katean 2013az geroztik emititzen den "Gogglebox" nazioarteko saio arrakastatsuan oinarrituta dago eta mundu osoko telebista askotan egin dira horren moldaketak. Joan den urritik, gurean dugu formatu berritzaile hau, euskaraz eta gure gizartearen errealitate eta aniztasunetik sortua.

Telebista ikusten dutenean (eta dugunean) zein ohitura dituzten (eta ditugun) agerian uzten du programak, eta pertsona horien arteko harremanak nolakoak diren ere erakusten digu saioak, atalez atal.

Hala, jada ezagunak eta gertukoak dira EITBko ikusle askorentzat Mutrikuko Mari Jose, Felitxu eta Hirune, Danel eta Eneko bikotea Iruñean zein Ander eta Ander lagunak, Donostian. Horiekin batera, Oihana eta Ania Gasteizen, Kris eta Luis Mari bikiak Oiartzunen, Zorione eta Galder ama-semeak Durangon…. Arrasateko Halima eta Nourdine neba-arrebak, Bergarako Ainitze eta Paulo zein Mirian eta Leire Urdulizen izan dira saioan ezagutuko ditugun azkenetariko batzuk.

Gauero izango dugu horiekin guztiekin hitzordua, "Piztu Telebista Express" saioan. 21:15etik aurrera, ETB1en eta eitb.eus-en.

Horrez gain, asteazkenetan ohiko "Piztu Telebista" ere emitituko da, 22:30ean, ETB1en eta eitb.eus-en.