Herriak eta Hiriak
Lapurretak
Emakume bat atxilotu dute Gasteizko lau etxebizitzatan egindako lapurretengatik
Agentziak | Erredakzioa
21 urteko emakume baten kontrako eginbideak ere hasi dituzte. Fatxadetatik eskalatu eta leihoetatik edo balkoietatik sartzen omen ziren lapurtzeko.
Ertzaintzak 17 urteko emakume bat atxilotu zuen ostiralean Gasteizen, gutxienez hiriburuko lau etxebizitzatan urtarrilean izandako lapurretetan parte hartu zuelakoan. Gainera, 21 urteko emakume baten kontrako eginbideak hasi dituzte, delitu horien ondorioz ikertzen ari direlako.
Lapurreta horiek guztiak lehen solairuetan kokatutako etxebizitzetan egin ziren, fatxadatik eskalatu eta etxebizitzetara leihoetatik edo balkoietatik sartu ondoren, Eusko Jaurlaritzako Segurtasun Sailak astelehen honetan jakinarazi duenez.
Urtarrileko lehen hamabostaldian, lau lapurreta izan ziren Gasteizko Alde Zaharrean, Zaramagan, Koroatze auzoan eta Ehari-Gobeun kokatutako etxebizitzetan. Beheko solairuetan edo lehen solairuetan kokatutako etxebizitzak ziren, eta leihoetatik edo balkoietatik sartu ziren guztietara, fatxadan gora eskalatu ondoren. Etxebizitza horietako bitan, bertan bizi direnak etxean zeudela sartu ziren, eta ezer lapurtu gabe ihes egin behar izan zuten.
Salaketak aurkeztu ondoren, gertaera horiek argitzeko ikerketa hasi zuten. Etxebizitzetan bildutako ebidentziak aztertu zituzten, eta, horretarako, Ertzaintzaren polizia zientifikoaren laguntza ere izan zuten. Egindako ikerketetan baieztatu ahal izan zen etxebizitza horietako batetik lapurtutako sakelako telefono bat bigarren eskuko gaiak saltzen dituen establezimendu batean saldu zutela. Aparatu hori berreskuratu eta legezko jabeari eman zioten.
Ostiral goizean, ikerketa horretaz arduratzen diren ertzainek lapurretetan ustez nahasita dagoen emakume bat atxilotu zuten Gasteizen, eta beste emakumea ikertzen ari dira delitu horiek argitzeko. Polizia aurrekariak dituzte biek.
