Francisco Escuderoren mendeurreneko kontzertua, gaur, ETB-1en

Francisco Escuderoren maisuaren musikaz gozatzeko parada izango da gaur goizean ETB-1en. Haren jaiotzaren mendeurrenaren harira, iragan azaroaren 25ean Zarauzko Aritzbatalde kiroldegian egindako emanaldi berezia izango da ikusgai goizeko 11etan.

200 haur ahotsek, Escuderok idatzitako 'Sinfonia Mitikoa' kantatuko dute. 1993an Gipuzkoako Abesbatzen Federazioaren enkarguz idatzitako lana da, On Joxe Migel Barandiaranen liburutik ateratako hiru euskal kondaira oinarri hartuta.

Zarauzko Txinpirin eta Zarautz Txiki, Zumaiako San Pedro Txiki, Azpeitiko Antxieta, Azkoitiko Bizkargi eta Donostiako Ekintza Txiki eta Kontserbatorioko abesbatzak arituko dira kantuan, Jose Antonio Sainz Alfaroren zuzendaritzapean eta hainbat instrumentu lagun dituztela. Narratzailearen papera Kandido Uranga aktoreak beteko du eta emanaldia aurkezten, berriz, Ainere Tolosa eta Egoitz Lasa izango dira.