Piches taldearen tranparen ondorioak, 'El Conquis 2013' saioan

"El Conquistador del Fin del Mundo" saioak joan den igandean izandako audientzia arrakastaren ostean (199.000 ikusle eta %24,1eko audientzia-kuota), eta datorren igandean Patagonian gertatuko denak sortutako ikusmina ikusita, irudi berriak eskainiko dituzte Patxi Alonsok asteazkenean aurkeztuko duen "El Conquis 2013" eztabaida-saioan (22:30ean, ETB-2n). Gainera, realityan gori-gorian dauden gaien inguruan  hitz egingo dute: Zer gertatuko da Piches taldearen eroskeria eta tranpa auziarekin?, Ondorio gehiago ekarriko al dizkio Manu Maritxalarri?, Zenbat lagun daude gai ilun honetan nahasita? Hau izango da eztabaida-saioko gai nagusietako bat. Gainera, Michelen azpijokoaren lekuko izan zen erreportaria zuzenean izango da saioan, eta Piedra Parada kanpamentuan gertatutakoaren irudi berriak emitituko dituzte.

Kapitainen jokoa baliogabetzeko erabakia, lau taldeen indarrak eta ahultasunak, eta hartu beharreko erabaki garrantzitsuak ere aztertuko ditu Patxi Alonsok gonbidatuekin batera. Mikel Goñi kapitain ohia, Gotzon Mantuliz eta David Seco irabazleak, eta Esti Pinedo, Isa Landa eta Patxi Aizpun lehiakide ohiak izango dira aste honetako gonbidatuak. Azken hau, Patxi, iazko edizioan Guanacos taldean izan zen eta, Kortarekin oso kritikoa izateaz gain, joan den igandeko protagonistetako baten defendatzaile sutsua da, Manu Maritxalarrena hain zuzen ere. Devi ere gonbidatuetako bat izango da. Aurtengo edizioko lehen kanporatua da Piches taldeko kideak ongien ezagutzen dituena.

Gainontzeko kanpamentuen inguruko gaiak ere jorratuko dituzte saioan. Beste taldeek Piches taldearen tranpak nola ikusten dituzten ezagutuko dugu, baita datorren saioan gertatuko dena ere. Kortaren guanacoek Pumas taldeko kide bat aukeratu behar dute duelura bidaltzeko. Juanitoren condorrek inmunitatea eman behar diote Pumas taldeko kideetako bati, eta Blancaren pumak grinatsu daude arriskuan nor izango den jakiteko.

"El Conquistador del Fin del Mundo" saioaren historiako tranpa onenen errepasoa, hurrengo jokoen nondik norakoen aurrerapena, eta igandeko saioan sortutako galderak dira Patxi Alonsok asteazken gaueko "El Conquis 2013" saiorako prestatuta dituen gainontzeko gaiak.

"El Conquis 2013" gaur gauean, 22:30ean, izango da ikusgai, "Teleberri"ren ostean, Euskal Telebistako bigarren katean.