Piches taldekoen gaua El Conquis 2013-n, Mari Carmen eta Josetxorekin

"El Conquistador del Fin del Mundo" saiotik kanporatutako azken bi lehiakideak hartuko ditu Patxi Alonsok gaur 22:30ean platoan: Josetxo eta Mari Carmen. Josetxok duelua galdu zuen Manu Maritxalarrekin batera eta berarekin izango da platoan Mari Carmen. Saioaren lehen fasea gainditzea lortu zuen Galdakaoko lehiakideak, baina talde berrian ez du askorik iraun. Cóndores Juanito Oiarzabalen taldeak duelurako izendatu zuen eta Pumas taldeko Leonek dueluan gainditu zuen Esqueleko ur hotzetan.

Josetxok kontuak eman behar ditu. Batetik, Michel izango du aurrean. Lehiakide uruguaitarra salduta sentitu zen eta Josetxok bere senean ez zegoela esan zuen. Dueluan gertatutakoaz eta lehiakideekin duen harremanaz aritzeko aukera ere izango du Josetxok. Gainera, aurrez aurre izango du Mari Carmen. Saioko amatxoaren inguruan ere direnak eta ez direnak esan zituen, lehiakorra ez zela, adibidez. Mari Carmen, aldiz, Juanito Oiarzabalen taldeko giroaz eta Peperen inguruan pentsatzen duenaz arituko da. Izan ere, badirudi lehiakide gipuzkoarra berpiztu egin dela Pumas Blanca Fernandez Ochoaren taldean dagoenetik.

Gainera, datorren astean immunitate jokoan gertatuko denaren aurrerapenak eskainiko dituzte "El Conquis 2013" eztabaida-saioan. Bestalde, kanpamentuetako giroaren berri ere izango dugu. Badirudi Jose Luis Kortaren kanpamentuan ahaztu dutela garaipenaren ondorengo poza. Berriz ere saioa utziko du Kortak? Juanitoren taldean giroa zapuztu egingo da? Pumas taldeko kideak prest daude fase berrirako? Manu Maritxalar, Julen Madina eta Isa Landa Piches taldeko kanporatuen solaskide izango dira saioan eta galdera horiei erantzuna ematen saiatuko dira asteazkenean, gaueko 22:30etatik aurrera, ETB-2n.

"El Conquis" saioa, 22:30ean, "Teleberri"ren ostean, Euskal Telebistaren bigarren katean.