Garesti atera zaio Ibairi erronka jo izana

Hotzak jota, minduta, etsita, lotsatuta... Horrela amaitu zuen Ibaik Patagoniako abentura. Andeen oinetan dagoen urjauzi bateko ur izoztuak "Dibisio Urdinaren" martiria menderatu zuen. Bere biktima aukeratu zuen, baina erratu egin zen. Dianak berriz erakutsi du saioaren bederatzigarren edizioko garailea izateko aukerak dituela. Ibairen hasierako bultzadari eutsi egin zion Dianak, eta ondoren itxaron besterik ez zuen egin. Ur-zurrusta izoztuaren azpian zenbait minutuz egon ondoren, Mungiakoak amore eman zuen eta duelua utzi zuen. Ordu erdi inguru behar izan zuen gorputzeko tenperatura bere onera ekartzeko. Saioak orain arte izan dituen bederatzi denboraldietan gutxien jan duten lehiakideak izan dira Puma taldekoak, baina hala ere Ibai baino gogorrago aritu zen Diana.

Condor taldeko kideek izugarrizko zaplastakoa hartu zuten taldearen heroia kanporatu zutenean. Aissa saioko erredaktore batekin haserretu zen Joxeri zenbait galdera egin zizkiolako. Joxe lur jota zegoen. Jakin bazekien berak gomendatu ziola Ibairi Diana aukeratzeko duelurako. Lan erraza izango zela pentsatu zuten, baina erratu egin ziren. Puma taldeko kideak indarberrituta daude, finalera heltzeko aukera gehiago dituztela ikusi baitute. Argi ikusi genuen Oskar, Iñaki eta Joxe ez daudela prest taldeko ahulenak salbatzeko helburuz arriskuan jartzeko.

Bestalde, Aissa oso ongi ibili zen immunitate jokoan. Erraz irabazi zuen, bere elastikotasunari eta erabilitako taktikari esker. Jokoa oinutsik egitea erabaki zuen, eta horri esker enborrean lotu zituen oinak. Ibaik aukera guztiak galdu zituen kanpamentura krema potea eramateagatik zigorra jarri ziotenean.

Hamar lagun gelditzen dira lehiaketan. Ixa, Aissa, Marta, Joxe, Iñaki, Oskar, Alex, Agate, Karen eta Diana Iguazura joango dira eta elkarren aurka arituko dira "El Conquistador del Fin del Mundo" saioaren hurrengo irabazleak izateko asmoz.