telebista
ETBn eta eitb.com-en
Pilota, saskibaloia, txirrindularitza eta errugbia, gaur
A.A.
EiTB
Horrez gain, aizkolari dema eta Realak Valentziaren aurka jokatuko duen partidaren laburpena eskainiko dira.
Kirol eskaintza bete betea dakar Euskal Telebistak gaurko. Pilota, saskibaloi, txirrindularitza, errugbi eta aizkolari emanaldiak egingo ditu, eta Realak Valentziaren aurka Anoetan jokatuko duen partidaren laburpena emango da.
ETB1en, 12:15ean, Endesa Ligako Estudiantes-Laboral Kutxa partidaren berri emango dute Asier Arangurenek eta Josean Aldalurrek.
16:00etan, herri kirolei eskainitako tartean, beste aizkolari desafio bat izango dugu ikusgai. Joan den astean Tolosan Olasagastik eta Arria V.ak burututakoaren ondotik, Donezteben dugu hitzordua asteburu honetan, Vicente-Saralegi eta Etxebarria-Larretxea bikoteen artean. Koldo Aldalurrek eta Joxe Etxebestek egingo dute goizean gertutakoaren kontakizuna.
17:00etan pilotaren txanda izango da. Bilboko Bizkaia pilotalekuko jaialdia Apezetxea-Larrinaga / Jaunarena-Peñagarikano neurketarekin hasiko da. Ondoren, Berasaluze II.ak eta Albisuk Urrutikoetxea eta Beginoren aurka neurtuko dituzte indarrak Bibitako Txapelketaren barruan. Hirugarren partidan Lemuno-Larunbe eta Mendizabal III-Tolosa izango dira nor baino nor gehiago. Xabier Euzkitze, Joxan Tolosa eta Elena Azpeitia izango dira esatariak.
19:30ean pilota emankizuna ETBKra pasako da, ordu horretan 'Gol Festa' saioa hasiko baita ETB1en. Futbol jardunaldiaren errepaso zabala egingo dute bertan Mikel Olazabalek eta kirol erredakzioko kazetariek. Bertan, tarte berezia eskainiko diote Bartzelona-Osasuna partidari. Gaueko bederatzietan Realak Valentziaren aurka Anoetan jokatuko duen neurketaren laburpena 22:50ean egingo du Igor Sarriegik.
Bestalde, ETBKn bezperako Gernika-Getxo errugbi partida izango da ikusgai 13:00etan, Jon Ander Gorosperen kontakizunarekin. Eta 14:30ean, Fermin Aramendiren eta Xabier Usabiagaren eskutik, Tirreno-Adriatiko lasterketaren 5. etapa jarraitu ahal izango dugu zuzenean. Amatricetik abiatuta, Guardiagreleko harresian izango du helmuga.
Azkenik, 20:15ean Ezkurra-Endika / Urriza-Zubiri erremonte partida eskainiko da. Iñigo Aiestaranek eta Manuel Arrizabalaga Matxinek egingo dute kontaketa.
Saskibaloia, txirrindularitza eta pilota emankizunak eitb.com-en ere jarraitu ahal izango dira.
