Futbol Liga Profesionalaren jarraipen zabala, ETBn

Futbol Liga Profesionalaren hasierarekin batera, Euskal Telebistako kirol taldeak jardunaldi bakoitzeko partida eta protagonisten jarraipen zabala eskainiko du. Bigarren eta Bigarren B mailako euskal taldeen partidak zuzenean eskainiko ditu ETB1ek, eta horrez gain, "Gol Festa", "Tribuna Gol" eta "Teleberri Kirolak Berezia" saioek lehenengo eta bigarren mailako eguneko partiden inguruko informazio osoa, momenturik onenak eta protagonisten elkarrizketak eskainiko dituzte.

Zuzeneko emanaldiak

Zuzeneko emanaldiei dagokienez, Jon Elortzak aurkeztuko duen "Zilarrezko Futbola" saioak euskal taldeek Bigarren eta Bigarren B mailan jokatuko dituzten partidak eskainiko ditu zuzenean. Bigarren Mailako partiden kontakizuna Naxari Altuna kazetariak egingo du, eta 2B Mailako partiden emanaldia Xabier Anduezaren ardura izango da. Bi kasuetan, Juan Antonio Larrañaga aditua izango dute kontakizunean lagun, eta Iban Bengoetxea kazetaria zelaian izango da, protagonistei elkarrizketak egiteko.

Kirol saioak

Aurreko denboraldian bezala, "Gol Festa" eta "Tribuna Gol" saioek jardunaldiko partiden laburpenak, momenturik onenak, erreportajeak eta protagonisten elkarrizketak eskainiko dituzte asteburuan. Larunbatetan, Jon Elortza kazetariak aurkeztuko du "Gol Festa", ETB1en, eta Mikel Olazabalek gidatuko du saioa igandeetan. Euskal taldeen jarraipen zabala egiteaz gain, jardunaldiko gol guztiak eta gainerako partiden momenturik onenak ere eskainiko dituzte.

Igandeetan, gainera, Jose Ituartek "Teleberri Kirolak Berezia" aurkeztuko du ETB2n, eta Txemi Galarragak "Tribuna Gol" solasaldi saioa eskainiko du igande gauetan ETBK katean, bere ohiko kolaboratzaile taldearekin.

Horrez gain, euskal taldeen Europako ibilbidea eta astegunetan jokatuko diren Liga eta Kopa partiden jarraipena egingo du Euskal Telebistak. Kasu hauetan, partiden berri emango duten saio bereziak eskainiko dira astean zehar.