telebista
Final handia
Maixak irabazi du 'El Conquistador del Fin del Mundo 11' saioa
Redacción
Mutrikuarra nagusi izan zen azken proban, 'El Conquistador del Fin del Mundo' saioan inoiz izan den proba lehiatuenean.
Informazio gehiago (1)
Maixak, Mutrikuko Eritz Egañak, irabazi du ‘El Conquistador del Fin del Mundo’ saioaren hamaikagarren edizioa. Igerian abilezia ikaragarria erakutsi du azken proban, beste finalistei aurrea hartuta, abentura saioan inoiz egin duten probarik lehiatuenean.
Ozeano Barea izan da azken proba hau egiteko aukeratutako ingurunea, Palena ibaia itsasoratzen den leku zoragarria hain zuzen ere. Probaren lehendabiziko partea bikoteka egin behar izan dute: Iker Andekarekin aritu da eta Maixa Sergiorekin.
Lehendabizi kayaka eta arraunak aurkitu behar izan dituzte, ondoren buia bateraino arraun egin eta han zegoen ohar bat irakurri, eta azkenik ikurrina zegoen uharte bateraino igeri egin. Maixa eta Sergio atzetik joan dira hasiera batean. Baina igerian hasi direnean, dena eman dute eta Iker eta Andeka aurreratu dituzte. Maixa iritsi da lehendabizi uharteraino, ondoren Sergio, hirugarren Andeka eta laugarren Iker.
Lehiaketa irabazi ondorengo lehen hitzak mutrikuar guztientzat izan ditu Maixak. Batik bat Joxeba osabarekin gogoratu da, hark erakutsi baitio iparrorratza erabiltzen, marinelen korapiloak egiten eta jumareatzen.
Lehiakide guztiak eta 11. edizioko kapitainak
Amaierako galak aurtengo lehiakide eta kapitain guztiak elkartzeko balio izan du. Roberto Laiseka, Eneko Van Horembeke, Manu Maritxalar, David Seco, Juanito Oiarzabal eta Jose Luis Korta elkarrekin ikusi ditugu. Edizio hau kapitain gisa egin duen azkena izan dela esan du Kortak.
Unerik onenak eta txarrenak ere errepasatu dituzte: Piedra Paradara helikopteroan iritsi zirenekoa, Manuren eta Daviden arteko tentsioak, kapitainen hasierako duelua, Esqueleko baldintza gogorrak, Guanacoen eta Pumen ebakuazioa, Andekak ikurrina lapurtu zuenekoa, eta baita probak eta dueluak ere.
Ikusleen gogokoena
Baina sari bat eman gabe gelditu zaigu: ikusleen gogokoenaren saria. Bozketak aurrera jarraitzen du eitb.eus-en. Dagoeneko, 5 lehiakide geratzen dira: Cris, Nai, Raquel, Maixa eta Sergio. Hurrengo igandean, ekainaren 7an, izango den gala berezian jakingo dugu nor den ikus-entzuleen lehiakide gustukoena.
