telebista
22:15ean
‘El Conquis’ saioko lehiakide gogokoena aukeratzeko gala, gaur gauean
Bost parte-hartzaile daude gogokoena izateko lehian: Cris, Maixa, Sergio, Nai eta Rakel. Zuzenean egingo da gala, eta finala irabazlearekin aztertzeaz gain, abenturako une onenak gogoratuko dituzte.
Gaur jakingo dugu nor den ‘El Conquistador del Fin del Mundo’ saioaren 11. edizioko lehiakide gogokoena. Honako bost parte-hartzaileak daude gogokoena izateko lehian: Cris, Maixa, Sergio, Nai eta Rakel. Irabazleak 3.000 euro eta Turkiara joateko bi lagunentzako bidaia irabaziko ditu. Bestalde, webguneko bozketan parte hartzen duten guztien artean ere saria zozkatuko da: Laguardian luxuzko hotel batean asteburu bateko egonaldia.
Maixaren garaipena gogoan
Ozeano Bareko uretan egindako azken lehian Maixak lortutako garaipena ere izango dute gogoan gaurko 'El Conquis' berezian. Irabazlearekin berarekin zein Andeka, Sergio eta Iker beste hiru finalistekin batera aztertuko dituzte inoizko jokorik zirraragarrienean izandako sentsazioak.
Hortaz, gipuzkoarrak 20.000 euroko sariarekin zer egiteko asmoa duen jakingo dugu, haren castinga ikusiko dugu eta final handian eta abenturan zehar izandako une erabakigarriak errepasatuko ditugu.
Halaber, ‘El Conquis’ saioan izan diren iritzi-emaileek egindako kritikei erantzuteko aukera izango dute finalistek, iruzurren eta miaketen ondoren egindako kritikei erantzuteko, batik bat, egoera hark lehiakideak barregarri utzi baitzituen.
Finalistak eta gogokoena izateko lehian daudenek honako hauek izango dituzte alboan platoan: Manu Maritxalar, David Seco, Julen Madina, Isa Landa eta Gotzon Mantuliz. Halaber, ETB2ko saioak azken edizioan izan dituen partaide adierazgarrienak ere izango dira publiko artean.
‘Conquis 12’ martxan
Zuzeneko gala izango da gaurkoa, ETBk Miramomen duen egoitzan, Patxi Alonsok aurkeztuta. ‘El Conquistador’ saioko hamaikagarren edizioa oraintxe amaitzen da, baina, hurrengoa martxan da jada. Astelehenean, ekainaren 8an, hasiko dira saioko lehiakide berriak hautatzeko castingak. Hilaren 8an eta 9an Miramonen izango da hitzordua, 10ean Iruñean (Iruña Park hotelean), 11n eta 12an Bilbon, EiTBren egoitzan; eta, azkenik, astelehenean, hilaren 15ean, Gasteizen izango dira castingak, Canciller Ayala hotelean. Halaber, 'El Conquis'en webgunean bideo-castinga jarriko da martxan astelehenean, ekainaren 8an; beraz, aipatutako hitzorduetara joateko aukerarik ez duenak ere izango du parte hartzeko aukera, ‘El Conquis’ webgunearen bidez bideoa bidalita.
ta.