Azpeitiko Errekortari Txapelketa jokatuko da larunbatean

Santiago Egunez, errekortari txapelketa egingo da Azpeitiko zezen-plazan, Zezen Beltz elkarteak eta Toropasion enpresak, Azpeitiko Udalaren eta EiTBren laguntzaz, antolatuta. Momentuko errekortari onenek eskainiko duten ikuskizuna, ohi denez, egun batzuk geroago eskainiko du Euskal Telebistak, datorren abuztuaren 1ean hain zuzen ere.

Gaur egun errekortari txapelketen zirkuituan diharduten hamabi espezialista onenak izango dira nor baino nor gehiago Azpeitian bederatzigarren urtez antolatu den lehiaketan. Toropasion enpresak ekarriko dituen sei zezenen aurrean euren ausardia eta trebezia erakutsiz, ikuskizun paregabea eskainiko dute.

Errekortarietan bi aldiz Espainiako txapeldun izandako Jonatan Estebanez 'Peta' madrildarrarekin batera, Victor Holgado –bi aldiz corte puro ligako txapeldun izana-, Dany Alonso –Espainiako txapeldun aurten-, Juan Nieto kebratzailea –iaz bigarren Azpeitian-,eta Azpeitiko iazko txapeldun Paquito Murillo jauzilaria egongo dira.

Hamabi parte hartzaileen artean bi euskal ordezkari izango ditugu: Sergio Valle gasteiztarra eta Mika Romero baionarra. Eta zerrenda osatzen, Sergio Urruticoechea, Jose Manuel Medina 'Zorrillo', Saul Rivera, David Ramirez 'Peque' eta Eusebio Sacristan 'Use'.

Domecq jatorriko sei zezen plazaratuko dira, Toropasion enpresak La Campana eta Jimenez Pasquau ganadutegitik ekarritakoak. Lehiarako iaz arrakasta izan zuen formatua erabiliko dute: hasieran kanporaketak jokatuko dituzte, eta bukaeran, buruz burukoa.

Sailkapen proba jokatuko da lehendabizi: hamabi errekortariak lau laguneko hiru multzotan banatuko dira, eta talde bakoitzak zezen bat izango du. Multzo bakoitzeko bi onenek egingo dute aurrera. Bigarren fasean, hiru errekortariz osatutako bi talde arituko dira, eta talde bakoitzak zezen bana izango du. Amaitzeko, talde bakoitzeko onenen buruz buruko finala jokatuko dute zezen baten aurrean.

Errekortari txapelketara joateko sarrerak ohiko lekuetan daude salgai (Azpeitiko Udala, herriko zenbait taberna eta www.zezenbeltz.com ataria). Halaber, EiTBko webguneak bost sarrera bikoitz zozketatuko ditu.