Francori buruz ez genekiena, gaur, 'Objetivo Euskadi'n

'Objetivo Euskadi' erreportaje saioa igande gauetan izango da ikusgai aurrerantzean, 22:30ean, ETB2n. Etapa berri honi ekiteko, pertsonaia ezagun bat hartuko du protagonista: Francisco Franco. Haren heriotzaren 40. urteurrenean, Francoren inguruko informazio berri eta mamitsuak ekarriko ditu 'Objetivo Euskadi'k.

Francoren alde pertsonalean murgilduko dira Pilar Eyre idazlearen eskutik. Espainiako diktadorearen haurtzaro gogorra gogoratuko du Eyrek; aita gogorra zuen, jo ere egiten zuen, eta Edipo konplexu handia izan zuen txikitatik. Emaztearekin zuen harremana ere aztertuko du, Francoren arazo sexualak eta maitasun platonikoak ere azalduz. Gizatasunik gabeko diktadorearen nortasuna hobeto ulertzeko oinarriak emango ditu.

Beste idazle bat, Mariano Sanchez Soler, Francoren ondasunei buruz arituko da. Horren esanetan, Franco ez zen diru kontuetan batere zorrotza izan: "Ez zitzaion ardoa gustatzen, baina errege baten antzera bizi zen". Gaur egun, gainera, haren familiakoen eta gertueneko lagunen ondasunak ez daude batere argi.

Euskal Herriko hiriburuetan barrena bidaia egingo du saioak Francoren aztarnen bila. Ezin ahaztu, adibidez, Iruñean egindako fusilamendu publikoak.

Donostian egin zituen oporraldien inguruan, askorentzat ezezagunak diren zenbait kontu azalduko ditu 'Objetivo Euskadi'k. Esate baterako, Ondarretako kartzelako presoek aurrez aurre ikusten zituztela Francoren familiako kideak hondartzan zeudenean kartzelako leihoetatik.

Baina Francok, hondatu ez ezik, eraiki ere egin zuen. Gasteizko katedral zaharrak, adibidez, asko zor dio diktadoreari. Hala ere, apaiz guztiek ez zuten Francoren doktrinarekin bat egin, Juan Mari Zulaika Bilboko apaiz langile ohiak azalduko duen bezala.

'Objetivo Euskadi' gaur izango da ikusgai, 22:30etik aurrera, ETB2n.