"Teleberri" eguneko saiorik ikusiena Euskadin, % 27,8ko audientzia-zatiarekin

Ikus-entzuleek Euskal Telebistako albistegiak aukeratu dituzte berriz ere koronabirusarekin bizi dugun salbuespen egoerari buruzko informazioa jarraitzeko. Ostegunean, "Teleberri"ren bigarren edizioa eguneko saiorik ikusiena izan zen berriz ere Euskadin, % 27,8ko audientzia-zatia bereganatuz. Halaber, 2009az geroztik "Teleberri" ikusiena izan zen eta 482.000 ikus-entzuleko audientzia metatua lortu zuen Euskadin eta eragin eremuan. Eguerdiko edizioak ere datu bikainak eskuratu zituen: % 24,4ko kuota eta 359.000 ikus-entzuleko audientzia metatua.

Bestalde, ostegun gauean ikusgai izan zen La monarquía: un negocio rentable erreportajea "360º" saioaren inoizko atalik ikusiena izan zen, % 12,7ko audientzia-zatia bereganatuz. Eider Hurtadok aurkeztutako saioak 298.000 ikus-entzuleko audientzia metatua lortu zuen Euskadin eta eragin eremuan.

Halaber, aipatzekoa da asteazken gaueko "El Conquis" debateak izan zuen harrera bikaina. Patxi Alonsok aurkeztutako saioa denboraldiko ikusiena izan zen, % 11,7ko kuotarekin. Emanaldian zehar, 237.000 ikus-entzulek bat egin zuten uneren batean saioarekin Euskadin eta eragin eremuan.