Akitania Berria eta Pirinio Atlantikoetako hauteskundeak, Euskal Telebistan

Euskal Telebistak jarraipen berezia egingo die Ipar Euskal Herrian egingo diren hauteskundeei. Ekainaren 20an eta 27an, Akitania Berria eskualdeko Asanblea eta Pirinio Atlantikoetako departamenduko Kontseilua berrituko dira.

Franck Dolosor kazetariaren eskutik, datozen egunetan hainbat erreportaje eskainiko dira "Gaur Egun" eta "Teleberri" albistegietan. Gainera, asteazkenean, ekainaren 9an, hauteskundeei buruzko "Iparraldearen Orena" saio berezia izango da ikusgai ETB1en eta eitb.eus-en 15:00etatik aurrera.

Bestalde, "Egun On Euskadi" goizeko albistegiak hautagai eta ordezkari politikoekin elkarrizketak eskainiko ditu 10:10etik aurrera. Besteak beste, astearte honetan, ekainak 8, Andde Sainte Marie Akitania Berria eskualdeko kontseilariak Iban Garateren galderei erantzungo die. Sainte Marie independentea da eta 2015ean bezala, aurten ere Alain Rousset sozialistaren zerrendan dago. Asteazkenean, ekainak 9, Alice Leiciagueçahar kontseilari eta hautagai ekologistaren txanda izango da. Hurrengo astean, ekainaren 17an, Peio Etxeleku EAJren Ipar Buru Batzarreko presidentea hartuko dute ETBn. Oraindik zehazteko dute EH Bai koalizioko hautagaiari elkarrizketa.

Halaber, konexio eta saio desberdinetan hainbat lekukotasun eskainiko ditu Euskal Telebistak, besteak beste, honako ordezkari eta hautagaiekin arituko dira: Annick Trounday-Idiart (Departamenduko Gehiengoa-Errepublika Martxan), Anita Lopepe (EH Bai), Joseba Erremundegi (Baionako Gehiengoa), Peio Abeberry (Independentea), Mixel Esteban (Berdeak), Maider Arosteguy (Errepublikarrak), Sylvano Marian (Frantzia Intsumitua), Mathieu Bergé (Ezkerra) eta Edwige Diaz (Eskuin Muturra).

Hauteskunde biharamunean emaitzak aztertzeko, Eguzki Urteaga EHUko soziologia irakaslearen analisia entzuteko aukera eskainiko du EiTB Mediak.