albistea
Saio berria
'De Boca en Boca', Reyes Pradosek aurkeztutako eztabaida saioa ETB-2n
A.E.
EITB
Ostegunean, otsailaren 23an, hasiko da eta Urdangarin Auziaz eztabaidatuko dute.
Ostegun honetan, otsailaren 23an, 'De Boca en Boca' eztabaida saioa estreinatuko du Euskal Telebistaren bigarren kateak, Reyes Pradosek aurkeztuta. Lehen eztabaida honetan Urdangarin Auzia izango dute hizpide eta gaia jorratzeko bost solaskide gonbidatu dituzte: Inmaculada Sanchez, El Siglo aldizkariko zuzendaria; Maria Antonia Iglesias, kazetari eta telebistako kolaboratzailea; Iñaki Anasagasti, senatari eta Una monarquía marcada por la censura liburuaren egilea; Arantza Furundarena, kazetari eta gizarte kronista, eta Jesus Urraza, abokatua.
'De Boca en Boca' Trauko Managementek ETBrentzat ekoiztutako saioa da. Agustin Herranzek zuzenduko du. Saioak 90 minutuan zehar gizarte eta politika gaiak jorratuko ditu. Kaleko jendeak esateko duena ere kontutan hartuko dute.
Egun-eguneko gaiak jorratuko dituzte, hika-mikatsuak. Gai bakoitzean adituak, politikariak, solaskideak eta pertsona anonimoak ere hartuko dituzte. Herritarren iritziak garrantzia du saio honetan. Hartara, sare sozialei eta kaleko inkestei ere tarte egingo diete.
Ikus-entzuleek euren iritzia eman dezakete eitb.com-en dagoen programaren webgunearen bidez. Astero inkesta bati erantzun ahal izango diote sarean eta emaitzak saioan agertuko dira.
Saioko blogaren bidez eztabaidan jorratutako gaiak komentatu ahal izango dituzte erabiltzaileek. Halaber, twitter eta facebook-en ere jarraitu ahal izango da 'De Boca en Boca'.
Iradokizunak eta komentarioak saioaren posta elektronikoaren bidez ere helarazi daitezke.
Urdangarin Auzia
Otsailaren 23an, 'De Boca en Boca' saioak azken hilabeteetan pil-pilean dagoen gaia jorratuko du: Urdangarin Auziarena.
Otsailaren 25ean, Iñaki Urdangarinek Palmako epaitegietan deklaratuko du. Espainiako errege familiako kide bat eskandalu handi baten protagonista da lehen aldiz, eta gainera inputatua dago. Gaiaren inguruan galdera asko sortu da eta erantzunak bilatu eta hausnarketa egiteko punta-puntako gonbidatuak izango dituzte.
'De Boca en Boca' ostegunero izango da ikusgai ETB-2n 23:00etatik aurrera.
