Martxan dira “El Conquistador del Caribe 19”ko castingak

Geroz eta gutxiago falta da telebistako abentura realityrik gogorrena hasteko. Izan ere, "El Conquistador del Caribe" lantaldea hasi da jada lanean 19. edizioa prestatzeko.

Saioaren oinarririk garrantzitsuena, ez bairik gabe, lehiakideak dira. Abenturaren erronka gogorrei aurre egiteko geroz eta prestatuagoak daude parte hartzaileak, eta datorren urteari begira, horiek aukeratzeko hautaketa prozesua martxan da dagoeneko, aurrez aurreko castingen eta online castingaren bitartez.

Aurrez aurreko castingak, hitzorduarekin

Hemendik aurrera, Euskal Herriko hainbat hiriburutan izango diren aurrez aurreko castingetan parte hartzeko hitzordua eskatu beharko dute lehiakide izan nahi duten hautagaiek. Horretarako, email bat bidal behar da conquistador@hostoil.tv helbidera eta mezuan, izen-abizenak, adina (18 urtetik gora), herria eta telefono zenbakia aipatu beharko dituzue. Saiotik bertatik jarriko dira zuekin harremanetan, hitzorduaren data, lekua eta ordua zehazteko.

Online castinga, irailaren 15etik 30era bitartean

Horrez gainera, urtero legez, bada hautaketa prozesuan parte hartzeko beste bide bat, online castinga, hain zuzen. "El Conquistador del Caribe" saioaren webgunetik bidal dezakezu bideoa. Bertan, formulario bat bete beharko duzu, lege oharra eta datu pertsonalen tratamendurako politika onartu, bideoa erantsi eta bidali. Hartara, Conquiseko Komunitateko kide bihurtuko zara.

Kontuan izan komenigarria dela bideoa formatu horizontalean grabatzea, eta artxiboaren iraupenak, pisuak eta Interneteko konexioak eragina izan dezaketela bideoa igotzeko prozesuan. Irailaren 30era arte egongo da online castingaren bidez bideoak bidaltzeko aukera.

Zure bizitzako esperientziarik zorrotz eta gogorrena, eta, aldi berean, aberasgarriena bizi nahi al duzu? Ez ahaztu zu izan zaitezkeela hurrengo konkistatzailea.

Zorte on guztioi!