telebista
EITB Pilotaren Etxea
Altuna III vs Peio Etxeberria Lau T'erdiko final handia, igandean, EITBko kanaletan
EITB Media
Profesional talde zabala arduratuko da pilotaren zirrara eta ikusgarritasuna ikus-entzuleei helarazteaz ETB1en, Euskadi Irratian, Radio Euskadin eta eitb.eus-en.
-
Peio Etxeberria eta Jokin Altuna, aurrez aurre, igandeko finalean
Igande honetan Jokin Altunak eta Peio Etxeberriak Bilboko Bizkaia pilotalekuan jokatuko duten Lau T'erdiko Txapelketako finala zuzenean ikusi eta entzungo da EITBko hedabideetan: ETB1, Euskadi Irratia, Radio Euskadi eta eitb.eus. Aukera izango da, halaber, finalaren kontakizuna eta eduki bereziak sare sozialen bidez jarraitzeko, Twitterren (@eitbkirolak) zein Instagram (Kirolak_eitb).
"ETB Kantxa" saioa 16:30ean hasiko da ETB1en eta eitb.eus-en, Jon Balenziagak aurkeztuta. Jaialdiaren kontakizuna egiteko Xabier Euzkitze, Elena Azpeitia, Abel Barriola eta Mikel Idoate izango ditu lagun. Bestalde, finala amaitu ostean, norgehiagokaren analisia egiten lagunduko diote Pedro Mari Goikoetxeak eta Gentzane Aldaik, Barriola eta Idoaterekin batera. Set berezitik pasako dira, halaber, bi finalistak.
Bestalde, Euskadi Irratian Kepa Iribarrek, Haritz Gallastegik eta Oinatz Bengoetxeak kontatuko dute partida Bizkaia pilotalekutik zuzenean "Hiru Erregeen Mahaia" saioan. Radio Euskadiren kasuan, berriz Mikel Bilbao, Juan Martinez de Irujo eta Jagoba Arostegi izango dira bidali bereziak. Diego Arambalzak gidatuko duen "Kirol Festa" saioaren barruan jarraitu ahal izango da kirol hitzordu garrantzitsua.
