albistea
22:15ean
Atsuak hauteskunde kanpainan nahaspilan ibili dira
M.A.
EITB
Maikruxek eta Maikarmenek galdera lotsabakoak egingo dizkiete lehendakarigai guztiei, gaur gauean ETB-1en.
Hauteskundeen inguruan, 'Kontuz, Atsuak!' saioaren atal berezia izango da ikusgai ETB-1en, gaur gauean. Atsuek hauteskunde kanpainaren jarraipena egingo dute eta igandeko emaitzen ondorengo giroa helaraziko diete ikusleei. Saio berezia 22:15ean emango da, 'Goenkale'ren ordez. Arraldeko bizilagunen istorioak asteartean itzuliko dira.
Maikruxek eta Maikarmenek Kontuz Atsuak alderdi politiko berria sortu dute eta kalean atxikimenduak bilatuko dituzte. R12 kotxea kartelekin eta atondu, eta kanpaina egingo dute Euskal Herriko kaleetan zehar. Gainera, euren hauteskunde kanpainarako spot eder bat prestatu dute emakume biek.
Beti legez, Pello Zabalarekin izango dira, eta berarekin koalizioa bilatzen saiatuko dira. Gainera, lehendakarigai guztiekin egongo dira atsuak. Iñigo Urkullu, Patxi Lopez, Laura Mintegi, Antonio Basagoiti, Gorka Maneiro... denek erantzun beharko dituzte emakume bi hauen galdera lotsabakoak.
Ajuria Enea ere bisitatuko dute Maikruxek eta Maikarmenek. Beraien etxe berria zein izango den ikusi nahiko dute emakumeek; den-dena ondo miatu, eta dekorazio aldaketak pentsatzen hasteko parada izan nahiko dute.
Saioa amaitzeko, igandean, hilak 21, Bilbon izango dira, emaitza onenak jaso dituzten alderdien egoitzetan, hango giroaren berri emateko.
