Debatea
22:15ean
Fagor eta atez ateko sistema hizpide, gaur gauean, 'Debatea'n
A.H.
EITB
Bi gai jorratuko dituzte: batetik, Fagor Etxetresnen krisialdiak dakartzan ondorioak, eta bestetik, asteburu honetan Bergaran zaborraren inguruan egingo den herri-galdeketa.
Bideoak (1)
Informazio gehiago (1)
Gaur gauean, ETB1eko 'Debatea'n bi gai jorratuko dituzte: Fagor Etxetresnen krisialdiak dakartzan ondorioak eta zabor bilketaren arazoa, asteburuan Bergaran egingo den herri-galdeketaren harira.
Fagor Etxetresnak enpresako langileak pairatzen ari diren egoera larria, manifestazioak, eta horrez gain, Basauriko Edesa-Fagorreko langileen itxialdiak eta Azpeitiko Grumal enpresako langileen mobilizazioak izango dira aztergai Xabier Usabiagak aurkezten duen saioan. Atzo Eusko Legebiltzarrean izan zen MCC, Fagor eta erakunde ezberdinen arteko bilerak eman dituen ondorioak aztertuko dituzte lau solaskide gonbidatuek: Angel Toña, konkurtso-administratzailea; Ivan Santamaria, Berria-ko Ekonomia Saileko kazetaria; Imanol Esnaola, Gaindegiako idazkari nagusia, eta Joxe Mari Larramendi, Arizmendiarretaren Lagunak elkarteko kidea.
'Debatea'ren bigarren zatian zaborrak izango dituzte hizpide. Asteburu honetan, Bergara Garbia plataformak deituta, herri-galdeketa egingo da. Bergarako bizilagunek bosgarren edukiontziaren edo atez ateko bilketa-sistemaren alde dauden bozkatu beharko dute. Zaborrak biltzeko sistemen eta errausketa planta eraikitzearen kontrako herri-plataformek eta mugimenduek euren iritziak plazaratzeko aukera izango dute gaur gaueko saioan. Zein da arazo hau konpontzeko bidea?
Gaiaz hitz egiteko, zortzi lagun bilduko dira mahaiaren bueltan: Patxi Amantegi (Atez atekoaren kontrako plataformako kidea), Denis Itxaso (San Marko Mankomunitateko presidentea), Imanol Lasa (Gipuzkoa Garbiko bozeramailea), Koldobike Olabide (Birziklapena bai, atez atekorik ez plataformako kidea), Mikel Izagirre (Erraustegien kontrako plataformako kidea), Ainhoa Beola (Gipuzkoako EH Bilduko bozeramailea), Garikoitz Plazaola (Eguzki taldea) eta Kepa Urzelai (Legazpiko alkatea).
'Debatea', 22:15etik aurrera ETB1en, Xabier Usabiagak gidatuta.
