'Goenkale'ko Mireia eta Manex, 'Goenzale' saioaren estreinaldian

"Goenzale" saio berria estreinatuko dugu gaur, martxoaren 12an, eitb.com-en eta ETB-3n. Xabi Hoo izango da aurkezlea, Enkore taldeko abeslaria, eta saio bakoitzean "Goenkale" telesaileko aktoreak izango dira gonbidatu. "Goenkale"ren aurrerapenak eta bideo bereziak ikusteaz gain, "Goenkale"ko aktoreei galderak egin ahal izango zaizkie.

Lehenengo gonbidatuak Maitena Salinas (Mireia) eta Joanes Passicot (Manex) izango dira. Izan ere, egun horretan emango den atalean gertakizun larriak bizi beharko dituzte pertsonaia horiek. Gertakizun horietako batzuk grabatzeak, gainera, baditu bere berezitasunak, eta nola jardun zuten azalduko digute.

Bi aktoreei galderak egin ahal izango dizkiozue, zuen galderak goenzale@eitb.com helbidera bidaliz, edota facebook eta twitterren zuen iruzkinak utziz. Gainera, Goenkaleren webgunean bertan badago galderak utzi ahal izateko esparru bat. Aktoreek zuzenean erantzungo diete zuen galderei.

Saioa asteartero emitituko da eitb.com-en eta ETB-3n, 23:15 aldera, zuzenean, "Goenkale" telesaila amaitzean.