Herri txiki, Infernu Handi
21:45ean
Baigorrin izango da 'Herri Txiki, Infernu Handi' gaur gauean
A.E.
EiTB
Pagadik eta Zuhaitzek Nafarroa Beherera egingo dute txangoa.
Informazio gehiago (1)
Pagadik eta Zuhaitzek Iparraldera egingo dute txangoa, gaur, 'Herri Txiki, Infernu Handi' saioan. Nafarroa Behereko Baigorri herrira joango dira, hain zuzen ere.
Pagadik Baigorriko gaztelu dotore bat bisitatuko du. Gaur egun, AEBetako bikote bat da gazteluaren jabe, baina salgai dago eta hainbat herritar eraikina erosteko ahaleginetan ari da. Baigorriko zelaiak estaltzen dituzten mahastietara ere hurbilduko da. Irulegiko ardo ospetsua ekoizten da eskualde horretan, eta inguruko hainbat ardo ekoizlek hazten dituzten mahatsak biltzen diren ardo-kooperatiban, Irulegiko ardoa dastatzera joango da bi langile gaztek lagunduta. Baigorriko larreetan bazkatzen duten behiak ere ezagutuko ditu gertutik bertako baserritar gazte baten eskutik. Trinketearen nondik norakoak ezagutzen lagunduko dion lagun bat ezagutuko du, eta jatetxe dotore batean amaituko du eguna aingirak dastatzen.
Zuhaitzek Baigorriko bi anaia musikazalerekin hasiko du eguna. Musika tresna asko dituzte etxean, eta guztiak aterako dituzte etxeko lorategira Zuhaitzek ezagutu ditzan. Ondoren, entrenamendu berezia egingo du Baigorriko Nafarroa errugbi taldearekin, eta errugbi zelaitik Baigorriko urrutiko auzo batera joango da, Ameriketan cowboy lanetan ibili zen 74 urteko gizon irribarretsu baten istorioak ezagutzera eta xanpaina edatera. Amuarrainak hazten dituzten arraintegi handi batera hurbilduko da ere bertako lanak nola egiten dituzten ezagutzeko, eta bide batez, piszinetako amuarrainak eskuz harrapatzeko zailtasuna ezagutuko du. Baigorriko txokolategi polit batean, mahaia konpartituko du bertan dagoen neska gazte batekin. Hark azalduko dio baigorritarrek herriarekiko duten maitasuna eta lotura estua, eta nola gazte askok, hirira joatea baino, herrian geratzeko hautua egin duten.
'Herri Txiki, Infernu Handi' 21:45ean izango da ikusgai ETB1en.
strong>