Sexuaren gaia hezkuntza alorrean nola lantzen den, gaurko 'SexSua'n

'SexSua' saioaren seigarren atala hausnarketa bultzatzeko baliatu nahi dugu; izan ere, astez aste hezkuntza sexualarekin lotutako gaiak landu ditugu, baina nola lantzen da hezkuntza sexuala bera Hezkuntzan? Gaur gauean helduko diogu horri.

Horretarako, unibertsitate inguruan, gazteen iritzia batzen hasiko da Jon Gomez Garai. Hala ere, gaia sakonago lantzeko, Lehen Hezkuntzako Zipiriñe eta Bigarren Hezkuntzako Ballonti ikastetxeak bisitatuko ditu, Sopelan eta Portugaleten, hurrenez hurren. Zer jasotzen dute ikasleek hezkuntza alor honi lotuta? Eta irakasleak prestatuta al daude ikasleen zalantzak argitzeko? Zein dira egin dizkieten eta erantzuten jakin ez dituzten galderarik bitxienak?

Egungo hezkuntza aztertzeaz gain, etorkizuneko irakasleak ere aztertu nahi ditu saioak. EHUko Magisteritza Fakultateko gela batera sartuko da aurkezlea, eta bertako ikasleei arazo eta egoera desberdinak proposatuko dizkie; nola jokatuko lukete, esaterako, euren ikasle haur bat gela erdian genitalak ukitzen hasiko balitz?

'SexSua' saioaren seigarren atala, gaur, 23:25ean, ETB1en.