Asteburu honetan hasiko da "Teknopolis" saioaren 25. denboraldia

Gaur goizean, irailaren 19an, aurkeztu da "Teknopolis" zientzia, teknologia eta berrikuntzari buruzko saioaren 25. denboraldia Elhuyarren egoitzan, Usurbilen. Hain zuzen, asteburu honetan hasiko da, ordutegi honetan: larunbatean 13:30ean ETB1en eta igandean 12:15ean ETB2n.

25. denboraldi honetan, irudi berriarekin dator "Teknopolis", eta, aurreko denboraldi guztietan egin duen moduan, honetan ere ikusleak zientziara gerturatu nahi ditu. Astero 30 minutu interesgarri eskaini nahi dizkie ikusleei, Euskal Herriko bertako zein munduko beste txoko batzuetako gaiekin. Iñaki Leturia Yurrita izango da aurten ere aurkezlea, eta zuzendariak, berriz, Nagore Rementeria Argote eta Leturia bera.

Leturiak prentsaurrekoan azaldu duenez, "irudi berriak "Teknopolis"en intentzioa ere erakusten du. Izan ere, irudi garbia eta zehatza da lehenengo begiratuan ikusten dena, baina helburu bat ere badu: informazioa argi ematen laguntzea". Telebista irudia eta soinua da, eta baliabide horiek ongi erabiliz gero zientziaz aritzea errazagoa dela nabarmendu du Leturiak; hain zuzen ere, zientzia-gaiak bereziki esker onekoak direla baliabide egokiak erabiltzen direnean.

"Teknopolis"en denboraldi berrian ikusiko ditugun gaien artean laborategiak, olatuak, ekosistemak eta etorkizuneko elikadura aipatu ditu, besteak beste, Leturiak. Eta horien artean badela lotzen dituen egoera bat: klima-larrialdia. "Norbanakook ezin diogu iskin egin, eta "Teknopolis"en kasuan azkenaldian ohartzen hasiak ginen ia gai guztietan agertzen zitzaigula. Bada, gure erantzukizuna ere bada klima-larrialdiari buruzko informazio zehatza eta zorrotza ematea eta aditzera ematea zenbateraino eragiten duen aldaketa global horrek".

Aurkezpena Elhuyarren egoitzan egin da, Usurbilen. Amaia Esquisabel Alegría Eusko Jaurlaritzako Ikerketa zuzendariak adierazi du 25 urtetan zehar "Teknopolis" erreferente bihurtu dela zientzia, teknologia eta berrikuntzaren zabalkundean. "Hainbeste urtez bizirik irauten duen programa batek agerian uzten du gure gizarteak interesa duela zientziarekiko eta teknologiarekiko. "Teknopolis" euskal zientziaren eta mundu mailako zientziaren leihoa da, eta astebururo azken lan eta aurrerapen zientifiko eta teknologikoen berri ematen digu, denontzat eskuragarriago eginez".

Gorka García Peral ETBko Programa eta Arte zuzendariak, besteak beste, "Teknopolis"en aitzindaritzan jarri du azpimarra, eta saioa zientzia-gaien ikus-entzunezko leiho nagusia dela gaineratu du. Halaber, Batzen gaituzten emozioak EITBren leloa gogoratuz, esan du EITBk emozioen bilgune izan nahi duela. Ildo horretatik, erantsi du "Teknopolis"ek asmatu duela euskal, ikus-entzuleen jakin-mina modu ikusgarri, erakargarri eta zehatzean asetzeaz gainera, zirrara eta emozioak eragiten "programan landutako erreportajeekin eta elkarrizketatuen lekukotzekin".

Jon Abril Olaetxea Elhuyarreko koordinatzaile nagusiak, bestalde, esan du urte berezia dela hau Elhuyarrentzat. "50. urteurrena ospatzen ari gara, eta Teknopolisek berak ere 25. denboraldia du aurtengoa. 50 urte zientziaren zabalkundean, euskara ardatz, Euskal Herriko zientzia eta teknologiaren erreferente handienetakoak dira Elhuyar eta Teknopolis bera". Abrilek gogoratu du hasiera-hasieratik komunitatea eraikitzea izan duela Elhuyarrek xede nagusitzat, eta "Teknopolis" saioak berak ere hori biltzen duela. "Euskal Herrian egiten den zientziaren erakusleiho aparta izateaz gain, herritarrak hezteko eta ikuspegi kritikoa eraikitzeko egiten dugu lan".

Bukatzeko, Abrilek Elhuyarren eta EITB Mediaren arteko lankidetza luzea nabarmendu du, eta eskerrak eman dizkie "Teknopolis"en edizio berrian babesle eta lankide diren erakunde guztiei, saioari emandako laguntzagatik: Eusko Jaurlaritzako Ekonomiaren Garapen, Jasangarritasun eta Ingurumen Saila eta Hezkuntza Saila, Euskal Herriko Unibertsitatea, Mondragon Unibertsitatea, Nafarroako Unibertsitate Publikoa, TKNIKA Lanbide Heziketari aplikatutako ikerketa eta berrikuntzako zentroa, Energiaren Euskal Erakundea eta BRTA.