Prestaketa

Tipula eta porrua zati txikitan eta azenarioa ilargi erditan zatituko ditugu. Paella-ontzi bat sutan jarriko dugu olio txorrotada on batekin eta esandako hiru barazkiak erregosten jarriko ditugu.

Bitartean, orburuak garbitu eta laurdenetan zatitu, ziazerbak garbitu, barrengorriak laurdenetan zatitu, berakatza ondo txikitu eta brokoliari loreak aterako dizkiogu. Aurrekoak 5 minutu erregosi ondoren, gainerako barazkiak gehitu eta beste 15 bat minutuz utziko ditugu erregosten.

Piperrautsa eta tomatea gehitu, pare buelta eman eta jarraian arroza gehituko diogu.

Arroza 2 minutuz nahasi eta erregosi gainerako osagaiekin eta jarraian saldarekin bustiko dugu. Gatzez ondu eta su bizian utzi lehen 10 minutuak, jarraian su ertainera jaitsi eta beste 6 minutu izango dugu horrela gure arroza. Tapa jarri eta 5 minutu egoten utzi.