Gizartea -
NIDO operazioa
"Man in the middle" metodoaren bidez 1.200.000 euroko iruzurra egin zuen taldea desegin dute Euskadin
Iruzur-metodo horren bidez, egileek bi enpresaren arteko komunikazioa oztopatzen dute, eta transferentziak inplikatuek kontrolatutako kontu batera desbideratzen dituzte.
N. B. | EITB MEDIA
Ertzaintzak, Polizia Nazionalarekin batera egindako operazio batean, "man in the middle" metodoaren bidez 1.200.000 euro baino gehiagoko iruzurra egin zuen talde kriminal bat desegin du, Euskadin eta Estatuan iruzurrezko bost transakzio eta atzerriko enpresetan jatorria duten beste bost atzeman ondoren.
Ertzaintzak ostiral honetan jakinarazi duenez, zazpi atxiloketa eta bederatzi miaketa egin dituzte Torrejon de Ardozen eta Alcala de Henaresen (Madril) eta Guadixen (Granada).
"Man in the middle" izenez ezagutzen den iruzurra honetan datza: hirugarren batek ohiko harreman komertziala duten bi enpresen arteko posta elektronikoen trukea oztopatzen du. Azken horrek ordainketa-datuak aldatzen ditu, eta, horren ondorioz, dirua beste kontu batera desbideratzen da.
Ikerketa 2023ko urtarrilean hasi zen; orduan, enpresa batek salaketa jarri zuen iruzur mota horrengatik, eta Ertzaintzak ikerketa hasi zuen Gipuzkoako Ikerketa Kriminaleko Lurralde Zerbitzuaren bitartez. Lehen ikerketen ondorioz, eta susmagarriak Madrilgo Erkidegoko herrietan bizi zirela kontuan hartuta, Polizia Nazionalaren laguntza eskatu zuten, eta bien artean NIDO izeneko operazioari ekin zioten.
Agenteek egiaztatu zutenez, inplikatuek dokumentu pribatuak manipulatu zituzten enpresen artean, eta faktura faltsuak erantsi zituzten posta elektronikoetan. Kriminalek bankuko kontuetan sartutako dirua atera zuten, dirua legez kanpo desbideratzeko.