Kartzelan sartu dute Donostian gizon bati eraso zion beste gizonezkoa

Martuteneko kartzelan sartu dute Donostiako Kristina Enea parkean gizon bat labankadaz zauritu zuen beste gizonezkoa, Eusko Jaurlaritzako Segurtasun Sailak jakitera eman duenez.

Gertaera joan den igandean izan zen, arratsaldeko 16:00ak aldera. Une horretan, 37 urteko gizon batek labankada bat jaso zuen gorputzeko alde batean, eta Donostiako Ospitalera eraman behar izan zuten ebakuntza egiteko.

Ertzaintzako patruila bateko agenteak lekura gerturatu ziren unean, gizonezko bat odoletan zegoela ikusi zuten. Zaurituak esan zuenez, erasotzailea bere ezaguna zen eta korrika alde egin zuen.

Geroago, 21 urteko erasotzailea Tabakaleran ezkutatuta aurkitu zuten eta han atxilotu zuten. Era berean, parkeko zakarrontzi batean erasoa egiteko ustez erabili zen aiztoa aurkitu zuten.