'Rastrojo', Los Amigos del Arte, Motxila 21 eta Chrisalys, txupinazorako hautagaiak

Uztailaren 6an sanferminetako txupinazoa nork botako duen aukeratu ahal izango dute iruindarrek ostegun honetatik aurrera, Iruñeko Udalak horretarako epea zabaldu baitu.

Jose Miguel Araiz 'Rastrojo', Los Amigos del Arte, Motxila 21 eta Chrisalys Nafarroa elkartearen artean aukeratu beharko dute herritarrek, hilaren 21era arte. Ekainaren 22an emango dute ezagutzera irabazlea, eta berdinketa izanez gero, irabazleek batera botako dute txupinazoa.

Iruindarrek gaurtik ekainaren 21era arte bozkatu ahal izango dute Iruñeko Udalaren webgunean, 010 telefonoan edo Civivox zentroetan.

Hirugarren urtez, herritarrek aukeratuko dute beren botoekin txupinazoa botako duen elkarte edo pertsona.

Erabakia errazteko bideoak

Iruñeko Udalak proposamenen minutu eta erdiko lau bideo argitaratu ditu. Horietako batean, 'Rastrojo'k ukuilutik hitz egiten du artzainen artean; beste batean, Los Amigos del Arte elkartekoek beren golardo eta musika-tresnak erakutsi dituzte Condestable Jauregitik; hirugarrenean, Motxila 21ko kideak Udaletxe plazan ageri dira, eta Chrisalys Nafarroa elkartekoak, Gazteluko Plazan, laugarrenean.