Publizitatea
Itxi

2020/11/27

08:20

Euskadi Irratia

32. RAKS saiak

"Osasun etxea" irratsaioak irabazi du Rikardo Arregi Kazetaritza saria

Garazi Urdanpilleta | EITB.EUS

Saioak pandemia garaian "alea eta lastoa" bereizten lagundu eta kalitatezko zerbitzu publikoa eman duela nabarmendu du epaimahaiak. Komunikazio arloan, "Egunean Behin" jokoarentzat izan da saria.

0:29
Rikardo Arregi sariak. ETBren bideo batetik ateratako irudia.
  • Whatsapp
  • Whatsapp
  • Telegram
  • Bidali

Euskadi Irratiko "Osasun Etxea" saioak irabazi du 32. Rikardo Arregi saria, Kazetaritza arloan. Arantxa Arza esatariak eta Felix Zubia medikuak igande goizero osatzen duten irratsaioak pandemia garaian kalitatezko zerbitzu pubilko eredugarria eman eta "alea eta lastoa" bereizten lagundu duela nabarmendu du epaimahaiak, ez baita informazioa ematera mugatu, aitzitik "entzuleen zalantzak zehaztasunez argitu dituzte, informazio kontrastatua eta tratu pertsonalizatua eskainiz".

Saria jasotzera oholtzara igo direnean, Arzak Zubiaren lana nabarmendu du, COVIDak irratsaioa erabat irauli baitie, eta astero aritu baita "informazio uholdea ordu erdiko saiora ekartzen, oporrik hartu gabe". Entzuleak ere izan dituzte gogoan, euren "babesik gabe saioa ez litzatekeelako ezer izango".

Komunikazio arloan, berriz, Codesyntax etxearen "Egunean Behin" jokoarentzat izan da garaikurra. Euskaratik eta euskaraz milaka galdera sortu dituzte, eta, epaimahaiak euskara sustatzeko eta "euskal kultura ezagutarazteko egindako lana" goraipatu du, "euskarazko komunitate bat eraiki duen komunikazio tresna irudimentsu eta arrakastasua" dela nabarmenduta. Saria jasotzerkoan, Codesyntaxeko kideek egunero minutu batez (gutxi gorabehera) euren jokoarekin bat egiten duen 61.000 pertsonatik gora horiei eman dizkiete eskerrak.

Sarituek Xabier Laka artistaren eskultura eta 9.000 euroko saria eskuratu dute. Gainontzeko finalistek ("Faktoria" albistegia, Berria egunkariko "Koronabirusaren datuak" atala, Miel Anjel Elustondo, “Ene kantak!”, Arteman, “Lur eta Amets” filmaren komunikazio prozesuagatik eta Mendiak eta Herriak elkartea eta Et Incarnatus Orkestra, Urmuga proiektuaren iragarkiagatik) Xabier Lakaren serigrafia jaso dute oroigarri moduan.

Sari-banaketa, Xabier Lete gogoan

Andoaingo Udalak antolatu eta Eusko Jaurlaritzak lagundutako sarien 32. ekitaldian Xabier Lete izan dute gogoan bere heriotzaren 10. urteurrenean, eta Antton Valverde, Petti, Klara Mendizabal eta Joxan Goikoetxearen eskutik, "Jardin bat zuretzat", Bianditz", "Amsterdam" eta "Izotz ondoko eguzki" kantuak entzun dira, Aizpea Goenagak gidatutako saioan.

Epaimahaiak, gainera, "gizakiaren eta egiaren laudorioa" izeneko deklarazioa idatzi du bizitzen ari garen pandemia egoeraz, kazetaritza jardunaz eta komunikazioaz. Maite Goñi HUHEZIko irakasleak eta Joxe Ignazio asterretxea EHUko irakasleak jarri diote ahotsa manifestuari, eta desinformazio pandemikoa salatu eta egiazko komunikazioa laudoriatu dute.

Hauek izan dira 2020ko Rikardo Arregi Kazetaritza sarietako epaimahaia osatu duten kideak: Jose Inazio Basterretxea (EHUko Gizarte eta Komunikazio Zientzien Fakultateko irakaslea), Itxaro Borda (idazlea eta prentsa kolaboratzailea), Aingeru Epaltza (idazlea eta hainbat hedabidetako kolaboratzailea), Maite Goñi (MUko HUHEZIko irakaslea eta komunikazioan aditua), Elixabete Larrinaga (EHUko Gizarte eta Komunikazio Zientzien Fakultateko irakaslea), Ion Muñoa (Deustuko Unibertsitateko Komunikazio Graduko irakaslea), eta Jon Sarasua (MUko HUHEZIko irakaslea eta komunikazioan aditua). Mahaiburua Mikel Arregi Andoaingo Udaleko Euskarako zinegotzi arduraduna izango da, eta idazkaria, Patxi Baztarrika Andoaingo Udaleko Euskara teknikaria.

  • Bisitatuena

      Kargatzen ikusiena
      Kargatzen ikusiena
    ;