Arkaitz Estiballes eta Joxe Agirreren hileta, ‘Hitzetik Hortzera’n

Bertsolaritza zaletuek zita bat dute ostiral iluntzean edota igande bazkalostean ETB 1-en. Aste honetan Bizkaiko Txapelketako irabazlearekin, Arkaitz Estiballesekin, izango gara ‘Hitzetik Hortzeran’. Txapelketaren biharamuna berarekin biziko dugu bertsolariaren egunerokotasuna ezagutuz. Bestalde, Joxe Agirre, Oranda, bertsolariaren hiletan ere egongo gara, Azpeitian.

Bigarrenez jarraian jantzi du Bizkaiko txapela Arkaitz Estiballes galdakoztarrak eta Jon Artanok berarekin igaroko du txapelketaren biharamuna. Basauriko Kareaga-Goikoa eta Bizkotxalde ikastetxeetara lagunduko du aurkezleak, bertsolariaren irakasle lana ezagutzeko eta txapelketaren ondorengo hausnarketei buruz galdetuko dio. Gainera, Bizkaiko Txapelketako bertsoaldi onenak ikusiko ditugu saioan.

Bestalde, Joxe Agirreren omenez Azpeitian egindako hiletaren irudiak bilduko ditu programak.  Horretaz gain, Oranda ezizenez ezaguna zen bertsolariaren 1981 urteko artxibo irudiak errekuperatuko ditugu.

Astero bezala, ostiralean 21:00etan eta igandean 15:00tan emitituko da saioa ETB 1en, eta eduki guztiak ikusgai egongo dira eitb.com-en eta eitb nahieran-en.