telebista
Igandeko kirol emanaldiak
Olaizola II-Zabala / Xala-Barriola, zuzenean, ETB-1en eta eitb.com-en
A.A.
EITB
Horrez gain, Uxue Bilbao Basketen eta Caja Laboralen saskibaloi partidak, eta Elgoibarko Nazioarteko Krosa.
Igande honetako kirol programazioak Binakako Txapelketako ligaxkako laugarren jardunaldiko partida bat dakarkigu: Olaizola II-Zabala / Xala-Barriola. Eibarko jaialdia arratsaldeko bostetan hasiko da eta atariko neurketan, Aritz Lasak eta Laskurainek Ezkurdia eta Peñagarikanoren aurka jokatuko dute. Xabier Euzkitze, Joxan Tolosa eta Elena Azpeitia izango dira berriemaile ETB-1en eta eitb.com-en ikusgai izango den emanaldian.
Horrez gain, Endesa Ligako bi saskibaloi partida eskainiko dira: 12:15ean, ETB-1en, Uxue Bilbao Basket-CB Canarias, eta 19:00etan, ETBKn, Assignia Manresa-Caja Laboral. Asier Aranguren, Josean Aldalur eta Juan de la Vega izango dira berriemaile goizean eta Xabier de la Fuente eta Aitor Uriondo arratsaldean. Eitb.com-eko erabiltzaileek ere zuzenean ikusi ahal izango dituzte bi neurketak.
Bestalde, Elgoibarko Nazioarteko Krosaren zuzeneko kontakizuna egingo dute Juanan Legorburuk eta Xabier Leibarrek 12:30etik aurrera ETBKn. Eta, ondoren, afizionatu mailako pilotari leihoa zabalduko diote. Derion, Larretxea-Ezkurra eta Mikel Goñi-Antxia bikoteen artean jokatutako Joko Berriko partidaren berri emango dute Iñigo Aiestaranek eta Kepa Arroitajauregik.
Amaitzeko, Mikel Olazabalek gidatzen duen 'Gol Festa' saioan futbol jardunaldiaren errepasoa egingo dute kirol erredakzioko kazetariek 19:30ean hasita.
