Saskibaloia, pilota eta aizkolariak, gaur, ETB1en eta eitb.com-en

Kirol eskaintza zabala dugu gaur ETB1en, eitb.com-en eta ETBKn.

ETB1en zuzeneko bi emanaldi egingo dira, eta eitb.com-en ere ikusgai izango dira. 12:15ean, eta saskibaloia gustuko dutenentzat, Endesa Ligako Laboral Kutxa-H. Gran Canaria partida eskainiko dute, Asier Arangurenen, Josean Aldalurren eta Juan de la Vegaren kontakizunarekin. 17:00etan, berriz, Bilboko Bizkaia pilotalekuko jaialdia. Bertan, 5 ½-ko txapelketako finalerdia jokatuko dute Olaizola II.ak eta Merino II.ak, bezperako bikote garailearen aurka. Aurretik, Olaizola I-Ibai Zabala, Xala-Merino I eta Gorka-Larrinaga/Tainta-Iza partidak izango dira ikusgai. Xabier Euzkitze, Joxan Tolosa eta Elena Azpeitia izango dira esatariak.

Bestalde, Euskadiko aizkolari txapelketako kanporaketari egingo dio tartea ETB1ek 16:00etan. Bezperan Asteasun jokatutako probaren berri emango dute Koldo Aldalurrek eta Joxe Etxebestek.

Zesta, zaldi jauziak, automobilismoa eta erremontea, ETBKn

Zesta puntako bi norgehiagoka eskainiko ditu ETBK Satek: 12:00etan, Markinan jokatuko den Patxaran Zoco sariko finala, eta, 20:30ean, hilaren 5ean Noainen jokatutako Moresmau-Virseda/Korta-Konpa. Goizekoan, Josu Mugartegi 'Atain' izango du lagun Iñigo Aiestaranek esatari lanetan, eta, arratsaldekoan, Jabier Arkarazo.

14:00etan, Pedro Mari Goikoetxeak zaldi jauzien Bartzelonako Sariaren nondik norakoak ekarriko dizkigu, eta, 17:30ean, Gerardo Puentek 3 Formulako Monzako Sarian gertatutakoa bilduko du.

Azkenik, 19:30ean, Endika-Aizpuru III/Ezkurra II-Olazar erremonte partida eskainiko dute. Iñigo Aiestaran eta Manuel Arrizabalaga 'Matxin' izango dira esatariak.