telebista
22:30ean
"Plazandreak" saioaren estreinaldia, gaur gauean, ETB1en eta eitb.eus-en
EiTB
Reyes Azkoitiaren hirukoa (Irantzu Etxebeste-Nora Mendizabal-Olatz Arrizabalaga) eta Erlantz Garciaren taldea (Andrea Aldaregia-Olatz Ruiz de Larramendi-Naroa Agirre) lehiatuko dira lehen saioan.
Emakumezkoen pilota ezagutzera emateko asmoz jaio den "Plazandreak" saio berritzailea estreinatuko du Euskal Telebistak gaur gauean. Irungo Uranzu pilotalekutik egingo da emankizuna, eta bi talde ikusi ditugu lehian: Reyes Azkoitiaren hirukoa, Irantzu Etxebeste-Nora Mendizabal-Olatz Arrizabalaga, eta Erlantz Garciaren hirukoa, Andrea Aldaregia-Olatz Ruiz de Larramendi-Naroa Agirre.
Lehen emanaldia ostiralez egingo den arren, ostegunero izango da ikusgai "Plazandreak" saioa, 22:30ean, ETB1en eta eitb.eus-en. Datorren astean beste bi taldeak izango dira aurrez aurre: Mikel Inuntziagak zuzenduko duen Iera Agirre-Arrate Bergara-Amaia Aldai eta Naroa Elizaldek gidatuko duen Ainhoa Ruiz de Infante-Maite Ruiz de Larramendi-Leire Garai.
Hamabi pilotari izango dira, beraz, lehian, lau taldetan banatuta, eta talde bakoitzak entrenatzaile bat izango du. Astero, hiru partida jokatuko dituzte, pilota mistoa erabiliz eta hamabi tantora: lehenengoa eskuz banaka, ondoren binaka, eta, bukatzeko, eskuz banakako beste neurketa bat. Hiru puntu izango dira jokoan. Azken saioan, abuztuaren 27an, Euskal Herriko talderik onena zein den jakingo dugu.
"Plazandreak" saioak helburu bikoitza izango du: batetik, hamabi pilotariek euren jokoa erakusteko aukera izango dute telebistak eskainiko dien plaza berri honetan, eta, bestetik, emakumezkoen pilotari bultzada emateko balio izango du.
Kantxan gertatzen dena beste hiru gunetako irudiekin osatuko dute: aldagelak (takoak nola jartzen dituzten ikusteko), atsedengunea eta elkarrizketak egiteko lekua. Gainera, entrenatzaileek jokalariei ematen dizkieten aholkuak entzungo ditugu.
Euskal Telebistak modu berritzailean ekoitziko duen "Plazandreak" saioa Iñigo Aiestaran kazetariak eta Gentzane Aldai pilotariak gidatuko dute. Bestalde, aste honetan eta hurrengoan, Ane Muruamendiaraz kazetaria arduratuko da elkarrizketak egiteaz.
Gaur hasita, ostegunero, "Plazandreak", ETB1en eta eitb.eus-en, 22:30ean.
