albistea
22:00etan
Jesus Egiguren, gaur gauean 'Bisitaria'n
A.H.
EITB
PSE-EEko presidenteak bere jaioterrira, Aizarnara, eta Elgoibarreko Txillarre baserrira eramango du Xabier Euzkitze.
Bere mundu txikian, jaioterrian, egingo dio hitzordua Jesus Egigurenek 'Bisitaria'ri ostegun honetan. Aizarnako Agina baserrian jaio zen PSE-EEko presidentea, eta bere jaioterrira hurbilduko da Xabier Euzkitze. Nahiz eta urte luzez herrian egon gabe izan, bihotzean eta irudimenean egunero bueltatzen dela dio Egigurenek.
Politikari ezagunak, gainera, beste toki bat darama bihotzean eta buruan, Elgoibarreko Txillarre baserria, bertan Arnaldo Otegi eta esker abertzaleko beste zenbait kideekin bildu izan da hamar urtez gutxi gora behera, bake prozesuan aurrera pausuak eman nahiean.
Bakeaz, ETAri eta biktimei buruz, presoez eta azken finean, azken 30 urteetan Jesus Egigurenen buruan bueltaka izan diren hamaika gaien inguruan arituko da 'Bisitaria'rekin.
'Bisitaria' ostegun honetan emitituko da 22:15etik aurrera ETB-1en.
