albistea
Audientzia oharra
ETB lider hauteskunde gauean
A.E.
EITB
1.235.000 lagunek egin zuten bat hauteskunde gauean zehar ETBrekin.
-
EITBko aurkezleak
ETB lider izan zen atzo hauteskunde gauerako prestatu zituen saio bereziekin. 19:30ean hasi ziren hauteskunde albistegiekin 1.235.000 lagunek egin zuten bat gaueko uneren batean, TN Sofres audientzia neurtzen duen enpresak emandako datuen arabera.
ETB-2n 20:45ean, lehen emaitza errealak ezagutu baino minutu batzuk lehenago, eskainitako tarte bereziak %27ko audientzia izan zuen eta 281.000 pertsonek ikusi zuten,bataz beste, EAEn eta eragin esparruan.
Africa Baetak, Estibaliz Ruiz de Azuak eta Asier Odriozolak gidatu zituzten hauteskunde saio bereziak ETB-2n. Esan bezala, 20:45ean hasi zena eguneko ikusiena izan zen eta bere ordutegian ere lider.
Horrez gain, 19:35ean Ipsos enpresak EITBrentzat egindako galdetegiaren emaitzekin eskainitako saioa ere audientzia buru izan zen bere tartean: %20,2ko sharea izan zuen eta 157.000 ikus-entzule bataz beste.
Bestalde, ETB-1en 19:45etik aurrera hauteskunde saio bereziak Ander Arzak, Xabier Usabiagak eta Saioa Martijak aurkeztu zituzten. Tarte hauekin 372.000 lagunek egin zuten bat, uneren batean.
Egun osoan, halaber, ETBk %21,5eko audientzia izan zuen. ETB-2 izan zen katerik ikusiena Euskadin, %16,5eko audientziarekin eta ETB-1ek 3,4%ko audientzia izan zuen.
eitb.com-ek 100.000 erabiltzaile bakarretik gora hauteskunde egunean
eitb.com EITB taldeko webguneak 100.00 erabiltzaile bakar baino gehiago izan zituen urriaren 21ean, Eusko Legebiltzarrerako hauteskundeen egunean. Gainera, milioitik gora izan ziren ikusitako orrialdeak. Horien artean, herriz-herriko emaitzak eta zuzeneko emankizunak nabarmendu ziren.
Interneteko audientzia neurtzen duen Nilesen online enpresaren arabera, guztira 101.524 nabigatzaile bakar izan ziren eta 1.276.415 orrialde ikusi ziren. Bisitaldi bakoitzeko iraupena 26:33 minutu izan zen eta bisitari bakoitzak 10 orrialde ikusi zituen, bataz beste.
Hauteskunde emaitzen bilatzaileak sortu zuen interes gehien erabiltzaileen artean. Izan ere, emaitza orokorrak, lurraldez lurralde eta herriz herri kontsultatzeko 421.881 orri ikusi ziren.
