Zubizarretaren 'Sakonean, itsasoa ikusten da', euskal memoriaren atal bat Miangolarra familiaren lorratzean

Publikatuta: 2023/11/10 15:35 (UTC+1) Azken eguneratzea: 2023/11/10 17:33 (UTC+1)

Ilaski Serranorekin elkartuko da larunbat honetan Patxi Zubizarreta Miangolarratarren historiaz hitz egiteko. Joserra Senperena pianistaren bitartez jakin zuen Zubizarretak Miangolarratarren historiaren berri, 'Sakonean, itsasoa ikusten da Miangolarratarren uberan' (Txalaparta) liburuan bildu duena.

1:17

Whatsapp
Whatsapp
telegram
twitt
Bidali
Esteka kopiatu

Bideoak (1)

Zubizarretaren 'Sakonean, itsasoa ikusten da', euskal memoriaren atal bat Miangolarra familiaren lorratzean

Larunbat honetako "Artefaktua"k Ilaski Serrano eta Patxi Zubizarreta elkartuko ditu Donostiako hotel batean, Zubizarretaren 'Sakonean, itsasoa ikusten da Miangolarratarren uberan' (Txalaparta) liburuaz solastatzeko.

Joserra Senperena pianistaren bitartez jakin zuen Zubizarretak Miangolarratarren historiaren berri, Donostian diskoetxe klandestino bat aurkitu zuela esan zionean. Han, Herri Gogoa diskoetxean, Xabier Lete, Lourdes Iriondo eta Antton Valverderen disko asko ekoitzi ziren. Pako Miangolarra izan zen guztiaren arima, eta haren familiaren historia hori osatzeko, 14 lekukoren oroitzapenak bildu ditu Zubizarretak 'Sakonean, itsasoa ikusten da Miangolarratarren uberan' (Txalaparta).

Eta, hain zuzen ere, Antton Valverde musikari eta abeslaria batuko zaie elkarrizketaren hondarrera, Zubizarretaren lagun handia izateaz gain, liburuan aipatzen den historiaren atal baten lekuko eta partaide izan baita. Gainera, opari berezia eskainiko dio Valverdek saioari, Lauaxetaren hitzekin sortutako 'Itauna' abestia zuzenean kantatu eta pianoarekin interpretatuta.

Arantxa Arza Euskadi Irratiko esataria izango da larunbat honetako 'Apalategia' ataleko protagonista. Arza "Landaberri" irratsaioaren gidaria da; nekazaritza, ingurugiroa edota etxeko eta baratzeko landare eta zuhaitzak zaintzeko informazioa eta aholkuak ematen ditu, Jakoba Errekondok lagunduta. Besteak beste, Errekondori zer liburu oparituko liokeen galdetuko diote.

Oñatitik dator aste honetako irakurlea; Ekhiñe Zumeta Beñat eta Unai Gaztelumendiren 'Bidea da borroka' Bertsozaleak Kultur Elkarteak argitaratutako komikiaz arituko da.

Galtzagorri elkarteak antolatzen duen Liburu Gaztea lehiaketatik dator larunbat honetako booktrailerra. UGANDARRAK taldeko kideak dira Aimar, Iker, Markel, Martin eta Xabier, eta 'Ikusezin' izeneko liburua aukeratu dute horretarako; Eloy Moreno Olaria da testuaren egilea, Pablo Zerda marrazkigilea eta Denonartean-Cenlit argitaletxea.

Guztia, saioa osatzen duten beste atalekin batera, larunbatean, 12:45ean, ETB1en.