Aliziaren amnesia eta Ernestoren epaiketa, 'Goenkale'n

"Goenkale"ren gaurko atalean, Alizia koma egoeratik atera dela ikusiko dugu. Halere, amnesia du, eta duela bost urteko errealitatean bizi da. Germanekin maitasun harremana duela uste du, eta Kandidok kartzelan jarraitzen duela pentsatuko du. Egoera hori oso deserosoa izango da familiarentzat. Ez dute bere okerretik atera nahi, ez diote kalterik eragin nahi, baina egoera jasanezina da.

Arraldera neska italiar berezi bat iritsiko da Erasmus bekarekin, Paola, eta Kevinek Atxuriko zerbitzari bezala kontratatuko du.

Bestalde, Ernestoren aurkako epaiketa burutuko da. Germanek uste zuen bezala, Inesek bere aitaren aldeko adierazpena egingo du, eta horrek bien arteko harremanean haustura ekarriko du.

Etxegarai familia ezagutzen jarraituko dugu: etxe berrira aldatuko dira, eta etxe-aldaketan Taniaren egunkaria desagertu egingo da. Bere sentimendu sakonenak idazten ditu bertan: etxe berriari susmo txarra hartzen dio, eta badirudi baduela hori pentsatzeko zergatirik; izan ere, lorategian zerbait dago lurpean ezkutatuta…

Ez ezazu galdu "Goenkale", astelehen eta astearteetan, 22:15etik aurrera, ETB1en.