'Jai Alai: Azken hegaldia' dokumentala, gaur gauean, ETB1en eta eitb.eus-en

Astelehenero ETB1 zestaren txoko bilakatu du Jai Alai Winter Series txapelketak. Ziklo honekin bukatzeko, Jai Alai: Azken hegaldia dokumentala osorik eskainiko da ETB1en eta eitb.eus-en.

Daniako pilotalekuan aritu diren hainbat pilotari hurbiletik ezagutu ahal izango ditugu dokumentalean. Daniako frontoiaren itxiera AEBn inflexio-puntua izan da euskal pilotaren historian; 120 urtez munduan barrena bidaiatzen ibili ostean, zesta-punta sorterrira dator azkenik. Jai Alai: Azken hegaldia dokumental sortak Daniako pilotariak ditu protagonista. Pilotariak etxera itzuli izanak zesta-puntaren aro berri bat abiatu du. Lehengo atalak Daniako frontoiaren itxiera jaso eta Magic City-ko kristalezko frontoi esanguratsuaren gorabeherak bildu ditu.

Hainbat hamarkadatan Euskal Herriko gazte zestalariek profesionalak izatearekin eta Ameriketara joatearekin egiten zuten amets. Floridako kantxa jendetsuetan onenen aurka egunero jokatu zuten, baina ametsa amaitu da eta galdera berriei aurre egiteko garaia da. Zer gertatzen da orain zestalari horiekin, eta, batez ere, zer gertatuko da zestarekin? Zein erronka eta amets berri eraiki gure kirola salbatzeko? 

Pilotariek zestaren Euskal Herrirako itzulera eta aro berriaren hasiera nola bizi duten aztertuko dute bigarren atalean. Hiru protagonistaren jarraipena egingo da, horien ziurgabetasuna eta hemengo bizitza berrira nola egokitzen saiatzen diren erakutsiz.

Jai Alai Winter Series neguko txapelketa berriaren sorrera deskubrituko dute, gure protagonistek bilatzen zuten aukera bikaina izan daitekeena. Zale gehiago sortu eta publiko berri bati heldu nahi dion txapelketa.

Bitartean, Eneritz Lizardi gazteak kontatu du nola hamazazpi urterekin Euskal Herriko zirkuituko jokalaririk zaharrena den. Gaztea izan arren, dagoeneko badaki berak eta bere lagunek egiten duten bideak belaunaldi berri bati irekiko dizkiola ateak.

Floridatik itzuli diren hiru pilotarik eta etorkizun handiko nerabe batek zestaren egungo errealitatea eta gure lurraldean berriro erreferente izateko ahalegina erakusten digute. Zalantzarik gabe, aro berri baten hasiera da.

Azken atalean, Jai Alai Winter Series txapelketak Euskal Herriko zesta-puntara ekarri duen itxaropen olatuaren isla izango da dokumentala. Astelehen gauero Gernikako frontoia, aurreikuspen guztien kontra, beteta ikusi dugu. Zesta-puntaren bizkunde hau txapelketan zehar ikusi duten protagonista eta eragileen iritziak bilduko ditu saioak: zestalari eta zestalari ohi, antolatzaile, babesle, EITBko arduradun eta hedabideetako adituena, besteak beste.

Gernika-Lumoko Jai Alai pilotalekua

Jai Alai: Azken hegaldia-ren azken atala 22:30ean eskainiko da, ETB1en eta eitb.eus-en.