'Zuek hor eta gu hemen' lore artean ibiliko da gaur arratsaldean

Loreak filmak zeresan izugarria eman du aurtengo Donostiako Zinemaldian, lehenengo aldiz, euskal film bat Zinemaldiko sail ofizialean lehiatu baita. Hori dela eta, filmeko hiru emakume protagonistak izango ditugu bihar "Zuek hor eta gu hemen" saioan: Nagore Aranburu, Itziar Ituño eta Itziar Aizpuru.

Aurretik, ordea, Anjel Alkainek eta Iker Galartzak gidatuta, eguneroko albistegi bitxia izango dugu. Egunkari zein albistegiek emititu ez dituzten albisteak kontatuko dizkigute, umorez.

Agurne Anasagastik gidatuko du tertulia garaia, eta Iro Landaluze, Mikel Goñi eta Josebe Iturrioz izango ditu mahai inguruan. Higiezinen agentziek argitaratzen dituzten iragarki kuriosoez arituko dira, baita iragarkietako etxe bereziez ere. Bestalde, asteartea asteko egunik txarrena den susmoa dute, eta hori konpontzen saiatuko dira.

Iro Landaluzek perretxikoen inguruan hitz egingo digu. Igaro den uztailean izandako perretxiko kolpe erraldoia erakutsiko digu, eta asteburu honetan perretxikoak hartzeko tokirik egokienak zeintzuk izango diren azalduko digu.

Jon Urbieta ere platoan izango dugu ikus-entzuleekin harremanetan, zuzen-zuzenean! Nola ez, zuen etxeko txokorik kuttun edo berezienak beharko ditugu! Bidali zuen argazkiak #zueketxean etiketa erabilita. Bestalde, etxeko txokoak altzariz dotore hornitzeko aplikazioak ere erakutsiko dizkigu.

Aktualitateko gai horiek guztiak umorez jositako esketxekin osatuko dira egunero. Dagoeneko hain ezagunak diren Karlos Arguiñano eta Martin Berasategui sukaldariak eta Fraileak izango ditugu, baina baita pertsonaia berriak ere: 30 urtez Torreviejan uda pasatzen duten gizonezkoak, dena asmatzen duen bidentea edota sexu-harremanen inguruko bideo tutorialak egiten dituzten bikotea.

Hau guztia eta askoz gehiago, 15:45ean hasita, ETB1en! "Zuek hor eta gu hemen"!