Urumeako seigarren zubia ireki dute, irteera bide berria

Odon Elorza Donostiako alkateak, Eneko Goia Gipuzkoako Bideetako Azpiegitura diputatuarekin batera, Urumea ibaia zeharkatzen duen seigarren zubia inauguratu du gaur. Errepide berri honek, hiriko irteera Irunerako saihesbidea eta Urumeako Autobiarekin lotzen ditu.

Azpiegitura trafikoarentzat irekita dago dagoeneko eta lehengo Burdinezko Zubia ordezkatzen du. Hala ere, azken honen egitura historikoa mantendu egin dute.

Trenbidearekiko paraleloan doa zubia, eta 3,25 metroko lau errei ditu, guztiak noranzko berdinean, baina horietako bik Urumeako Autobidera daramate eta beste biak Irun eta Loiolako auzoa lotzen dituen saihesbidera doaz.

Eraikuntza lanek bi urte iraun dute eta 4,5 milioi euro ordaindu behar izan dituzte. Guztia Donostiako Udalak eta Gipuzkoako Aldundiak ordaindu dute.

Elorza eta Goia izan dira, Donostiako beste zinegotzi batzuekin batera, zubi berri hau zeharkatzen lehenak. Bizikletan zeharkatu dute gainera, errepide honekin bizikletaren erabilera bultzatu nahi baitute.

Zubiak ez dauka izenik oraindik, baina alkatea "Errealaren Zubia" izenaren alde agertu da.

Gainera, eta Elorzak berak adierazi duenez, "hilabete gutxi barru" Urumea zeharkatzen duen beste zubi bat inauguratuko dute, Lehendakari Agirre Zubia edo bosgarren zubia izenaz ezaguna. Honek gaur inauguratutako seigarrena trafikoz hornituko du.