Euskadik eguraldi eguzkitsuarekin hasi du 2012. urtea

Urte berria giro eguzkitsuarekin eta politarekin hasi dugu. Euskalmet euskal meteorologia agentziaren arabera zerua, oro har, hodei gutxirekin egongo da eta goi-hodeiak egon arren, ez dute traba handirik jarriko. Arratsaldean eta gauean hodeiak ugaritu eta azken orduetan euria egiteko arriskua egongo da.

Haizeak hegoaldetik joko du tenperatura igoaraziz, maximoak 14-16 ºC-ren bueltan geratuko dira kostaldean eta barnealdean 10-12 ºC inguruan.

Astelehena, urtarrilak 2

Astelehena euriarekin hasiko dugu, baina arratsaldean egoerak hobera egingo du. Goizean zerua oso hodeitsu egongo da eta giro euritsua izango dugu, bereziki kantauri isurialdean. Arratsaldean, poliki-poliki atertuz joango da. Elur-kota 1000-1200 m inguruan kokatuko da.

Ipar-mendebaldeko haize ahul-bizia ibiliko da, bolada gogorrekin kostaldean eta mendi inguruetan. Tenperatura maximoak nahikoa jaitsiko dira eta 12 ºC-ren bueltan ibiliko dira kostaldean eta 8 ºC inguruan barnealdean.

Bestalde, herrizaingo sailak itsasaldeko arriskuari dagokion abisu horia 12tik 24ra (ordu lokala) ezarri du. Olatuen altuera adierazgarria igotzen joateko probabilitatea handia da, 2-3 m-tik hasita eta egunaren bigarren partean 4 m inguruan kokatu arte. Ipar-mendebaldeko hondoko itsasoa igotzen joango da, 2 m-tik egunaren azken orduetan 3,5-4 m ingurukoak izan arte.

Abisu hau asteartean ere, hilak 3, mantenduko da. Gainera, izotzari dagokion abisu horia ere ezarri da Arabako zenbait tokitan 00tik 10era (ordu lokala).