Lainoak ugaritu egingo dira eta euria botako du astearen hasieran

Euskalmet meterologia agentziaren arabera, astea giro nahasiarekin hasiko dugu. Astelehen goizean trumoi-ekaitzen hondarrak egongo dira, hala ere eguerdi aldean argiuneak izango ditugu. Arratsaldean hodeiak ugaritu egingo dira berriro eta zaparrada trumoitsuak bota ditzake.

Tenperatura minimoetan ez dugu aldaketa nabarmenik sumatuko eta maximoak zertxobait jaitsiko dira.

Astearte arratsaldean fronte hotz batek kantauri itsasoa zeharkatuko du, eta euria ekarriko du. Dena den, goiz partean zeruan ostarteak nagusituko dira. Arratsaldean zerua estalita geratuko da eta euria egingo du, bereziki kantauri isurialdean. Goizean hego-mendebaldeko haizea nahiko bizi ibiliko da.

Arratsaldean, berriz, haizeak ipar-mendebaldera egingo du, eta bolada zakarrak izango dira, batez ere norabide aldaketaren unean. Tenperatura maximoak apur bat jaitsi egingo dira.