Itxi

Herriak eta Hiriak

Iruñea

Armada etorbidea Katalina Foixkoaren etorbidea izango da martxotik aurrera

Agentziak | Erredakzioa

Izen aldaketak herritarrengan eragin ditzakeen arazoak saihesteko, "izen biak erabiliko dira" aldi batean. Martxotik aurrera, baina, Katalina Foixkoa izango da izen ofiziala.

  • Armada etorbidea

    Armada etorbidea. Argazkia: Google Maps

Iruñeko Armada etorbideak Katalina Foixkoaren etorbidea izena izango du martxotik aurrera, Katalina I.a Nafarroako erreginaren omenez. 1483 eta 1517 bitartean izan zen Nafarroako erregina.

Halaber, Katalina Foixkoaren ingurabidea Erreginaren Kantzilertza ingurabidea izango da, Errege-erreginaren Jauregiaren ondoan baitago.

Joseba Asiron Iruñeko alkateak jakitera eman duenez, "Nafarroako Erresumako erregina bikainetariko batek" etorbide "erreferentzial bat" izateko unea heldu da.

Armadaren etorbidea izena kentzeko erabakiaz galdetuta, honakoa esan du Asironek: "Ez dago inor kendu eta beste norbait jartzeko asmorik. Katalina I.a Nafarroakoak zuzeneko lotura du hiriarekin".

Asironen esanetan, izen aldaketak herritarrengan eragin ditzakeen arazoak saihesteko, "izen biak erabiliko dira" aldi batean. Horrela, hiru hilabete beharko ditu Iruñeko Udalak administrazio izapideak bideratzeko; martxotik aurrera, "izena behin betikoa eta ofiziala" izango da, baina "baliteke urteetan zehar gutunak norabide bietara bidali ahal izatea".

Iruñeko Udalak hitzaldia antolatu du Kondestable Jauregiko areto nagusian Katalina Foixkoaren garrantzi historikoa ezagutzera emateko. Mintzaldia 19:00etan izango da, Aitor Pescador historialariaren eskutik.