Prestaketa

Kuiatxo tutua:

Kuiatxoari zuritzailearekin xerra luzeak egin, eta elkarren ondoan jarri. Zartaginean gorritu.

Ontzi batean, izokina dadotan (zati batzuk gorde platera apaintzeko), oliba berdeak xerratuta. Kaparrak eta tipulatxa txikituta sartu eta nahastu.

Beste ontzi batean, gazta krema txorrotada bat esnerekin arinduta, limaren birrindura, zukua, aneta orriak txikituta eta gatza sartu, eta krema arin bat egin. Krema hori kuiatxo xerren gainean luzatu, eta beste ontziaren barrukoa jarri. Gainetik, izokin arrautzak luzatu. Kuiatxo biribilkia itxi, eta erditik moztu.

Ahuakate eta luzoker krema:

Luzokerra zuritu, haziak kendu, eta gazitu ura galdu dezan. 10 minuturen ondoren, uretatik pasa gatza kentzeko,  eta ontzi batean sartu. Bertara ahuakatea (zati batzuk gorde platera apaintzeko), martorria, txorrotada bat oliba olio, lima erdiren zukua, koilarakada bat maionesa eta gatza sartu, eta birrindu. Krema arin batek geratu behar du. Izotz batzuk sartu krema hozteko eta arintzeko.

Tipula eta errefautxo pickels-ak:

Ura epeldu gatzarekin eta azukrearekin; ozpina eta piper beltza gehitu, eta hotzean gorde. Tipula juliana eran eta errefautxoak xerra finetan moztu, bertara sartu, eta hotzean gorde.

BUKAERA:

Plater batean, kuiatxo tutua jarri. Gainean, tipula eta errefautxo pickels-ak, izokin eta ahuakate zatiak eta kimuak. Amaitzeko, ahuakate eta luzoker krema bota ingurutik.