Ekonomia -
Lan gatazka
EAEko Telelaguntza Zerbitzu Publikoko langileak, greban
Sindikatuek bi asteko greba deitu dute eta astelehenetik aurrera kalera aterako dira lan hitzarmenari buruzko negoziazioen blokeoa salatzeko.
O.A. | ERREDAKZIOA
Euskal Autonomia Erkidegoko Telelaguntza Zerbitzu Publikoko 120 langileek bi asteko greba hasi dute igande honetan, lan hitzarmenari buruzko negoziazioetan akordio biderik ez dagoela salatzeko.
Sindikatuek iragarri dutenez, orain arte ez dute adostasunik lortu telelaguntza zerbitzua kudeatzen duen GSR-Televida enpresa pribatuarekin.
Langileen ordezkarien arabera, aurrerapen nabarmenak izan dira enpresak egindako azken eskaintzan, baina proposatzen duen igoera ez da nahikoa bost urtez soldata izoztuta izan ondoren. Hala, astelehenetik aurrera langileak kalera aterako dira beren aldarrikapenak egiteko.
Hauek dira egiten dituzten aldarrikapen nagusiak: lan hitzarmenari buruzko negoziazioen 'korapiloa' askatzea eta beren soldata Espainiako Dependentzia Hitzarmenarekin parekatzea. Ildo horretan, sindikatuek nabarmendu dute langile batzuek hilean 1.000 euro baino gutxiago jasotzen dituztela.
Hori guztia dela eta, lan gatazkan duen erantzukizuna bere gain hartzeko eta konponbidean jartzeko eskatu dio Eusko Jaurlaritzako Enplegu Sailari.
Guztira, 35.000 erabiltzailek baliatzen dute telelaguntza zerbitzua EAEn.