Gizartea -
Lan-istripua
Bederatzi langile zauritu dira furgoneta istripu batean, Urkiolan
Portugalgoak dira langile guztiak, eta lau larri eraman dituzte ospitalera.
Erredakzioa
Portugalgo bederatzi langile zauritu dira, horietako lau larri, furgoneta errepidetik irten eta maldan behera erorita, Urkiolan (Bizkaia), Ertzaintzak jakitera eman duenez.
Ezbeharra 16:30 aldera gertatu da, BI-623 errepidean, Mañarian, Gasteizko noranzkoan. Oraindik argitzeke dauden arrazoiak medio, bederatzi langileak zihoazen furgoneta errepidetik irten, irauli, eta maldan behera erori da.
Portugalgo matrikula zeraman furgoneta horretan zihoazen beharginetako lau larri eraman dituzte Gurutzetako eta Galdakaoko ospitaleetara, eta gainerakoek kolpeak besterik ez omen dituzte jaso, aipatu iturriek azaldu dutenez.
Osakidetzak helikopteroz eraman du larri zaurituetako bat Galdakaoko ospitalera.
Era berean, suhiltzaileak ere bertaratu dira, furgonetan zihoazenetako batzuk ibilgailutik ateratzen laguntzeko.
