Gizartea -
2015eko lehen hiruhilekoa
Ama, 40 urtetik gora: hazten doan joera
Eustaten arabera, 40 urte beteak dituzten eta ama izaten diren emakumeen kopurua (% 8,6) 25 urte beherakoena (% 5,5) baino handiagoa da jada.
EITB.EUS
Gero eta zaharrago izaten gara ama. 40 urteak beteak dituzten amen kopurua % 8,6 da jada, eta 25 urte beherakoen kopurua gainditu du (% 5,5). Eustat Euskal Estatistika Institutuak 2015eko lehen hiruhilekoan izandako jaiotzen inguruko datuak eman ditu gaur.
Horien arabera, 30-34 urte bitarteko emakumeak dira ugarienak: adin tarte honetan izaten dira-eta erditze gehienak: % 38, 1. Segidan, 35-39 urte bitartean dituztenak daude (% 34,7), eta ondoren, 25-29 urtekoak (% 13,1).
Dena dela, gorantz doa ama 40 urtetik aurrera izateko hautua egiten duten emakumeak: % 8,6 dira jada, iazko epe berean baino sei hamarren gehiago.
Jaiotze kopuruari dagokionez, beherantz doaz. 2015eko lehen hiruhilekoan 4.590 haurtxo jaio ziren EAEn, iazko epe berean baino % 3,4 gutxiago.
Lurraldeka, Araban eta Bizkaian egin du behera jaiotze-tasak. Araban % 5,2 egin du behera; Bizkaian, % 5,1. Gipuzkoan, berriz, apur bat egin du gora jaiotza kopuruak: % 0,2. Zehatz jarrita, Araban 761 haurtxo jaio ziren, Bizkaian, 2.247, eta Gipuzkoan, 1.582.