Madrilek kutsaduraren kontrako protokoloak jarri ditu berriro martxan

Madrilgo Udalak kutsadura handiko uneetarako udal protokoloa jarri du abian, lehenengo mailan, eta M-30 eta hirira sartzeko errepideetan gehienezko abiadura 70 km/h-ra mugatu du goizeko seietatik aurrera.

Protokoloa automatikoki jarri da martxan, Pilar auzoko eta Cuatro Caminoseko neurgailuek bi orduz jarraian atzeman baitute gehiegizko kutsadura, "abisu" mailan.

Bigarren aldiz jarri dute protokoloa martxan azaroan, eta beste hainbestetan jarri dute araua martxoan onartu zutenetik, eta gaurkoa azaroren 12 eta 13koa baino larriagoa omen da.

Madrilgo kutsadura neurgailuen arabera, Pilar auzoan 328 mikrogramo NO2 zeuden metro kubikoko atzo 22:00etan.

Madrilgo Udalak garraio publikoa erabiltzeko deia egin du. Gainera, aire librean kirolik ez egitea aholkatu die arnas-arazoak dituzten pertsonei.