Vettel: 'Bizitzan orain arte izandako egunik onenetarikoa da'

Sebastian Vettelek "bizitzako egunik onenetarikoa" bizi duela adierazi du Indiako Sari Nagusian gailendu eta munduko txapelketa laugarren aldiz jarraian irabazi ostean. Alemaniarraren hitzen, azken lau urteetan egindakoa "sinestezina" da.

Vettelek esan duenez, "sekula" ez du pentsatu egun bizi duen egoera biziko zuenik, eta Bat Formulako lehen lasterketak Fernando Alonsoren lehen garaipenen garaian ikusi zituela azaldu du.

"Orain Fernandorekin ari naiz lehian, nire arerio nagusia izan da. Talentu handiko gidaria da, espainiarra, pasio handikoa...", esan du Red Bulleko pilotuak, hunkituta.

Munduko txapeldunak begirunea agertu die aurkariei eta Red Bull taldeko langileei, "asko lagundu" diotelako. Azken horiei pistan egindako azken derrapatzea eskaini die.