Frantziako Tourra
Frantziako Tourra
Etapako azken zatian gurpil ugari zulatu direla salatu dute, txintxetak zeudelako galtzadan
Agentziak | EITB Media
Taldeetako hainbat zuzendarik salatu dute euren txirrindularietako askori zulatu zaizkiela gurpilak, eta txintxetak azaldu direla gurpiletako ganberetan.
Frantziako Tourraren bigarren etapako azken zatian gurpil ugari zulatu direla salatu dute zenbait taldetako zuzendariek, galtzadan bota dituzten eta bizikleten ganberetan agertu diren txintxetek eraginda.
"Txintxetak jarri dizkigute. Ia txirrindulari guztiei zulatu zaie gurpilen bat, Victor Lafayri eta beste bati izan ezik. Pasatu egin direla uste dut, txintxetak soberan zeuden", adierazi du Bingen Fernandez Cofidiseko kirol zuzendariak.
Euskadi Irratiak jakin ahal izan duenez, Cofidiseko zazpi txirrindulariri zulatu zaie gurpila, tartean Ion Izagirreri. Hernani parean gertatu dira zulatze horiek.
Beste zuzendari batzuek ere adierazi dute txirrindulari askok arazo bera izan dutela.
