Literatura
Sariak
Eneko Bidegain eta Karmele Jaio, 111 Akademiaren sariko finalistak
N. V. | EITB Media
2023. urteko libururik onena zein izan den aukeratu beharko dute literaturzaleen elkarteko kideek, "Bichta éder" edo "Maitasun kapitala".
-
Eneko Bidegain "Bichta éder" eleberriaren idazlea
"Bichta éder" Eneko Bidegainen liburuak edo "Maitasun kapitala" Karmele Jaiorenak. Biotako batek irabaziko du 111 Akademia irakurzaleen taldearen saria aurten.
Lehen bozketa batean iaz kaleratutako literatura lan guztien artetik zazpi hautatu eta gero ("Alaska", Castillo Suarez; "Cayo hueso", Oihane Amantegi; "Hausnarrean" Josebe Blanco; "Itzulerak" Miren Agur Meabe; "Ura saltoka", Juan Kruz Igerabide; "Bichta éder", Eneko Bidegain; eta "Maitasun kapitala", Karmele Jaio), bi finalista izendatu dituzte 111 Akademiako kideek: "Bichta éder" eta "Maitasun kapitala".
Bigarren bozketan, ez liburu batek ez besteak ez dituzte botoen % 40 lortu; beraz, bi finalistetako baten alde bozkatu beharko dute liburuzaleek apirilaren 28ra bitartean, hirugarren eta azken bozketan.
Azkeneko urteetan, lan hauek irabazi dute 111 Akademiaren saria: "Azken etxea" (Arantxa Urretabizkaia), "Eraikuntzarako materiala" (Eider Rodriguez), "Argiantza" (Pello Lizarralde), "Aitaren etxea" (Karmele Jaio), "Fakirraren ahotsa" (Harkaitz Cano), "JenisJoplin" (Uxue Alberdi), "Elkarrekin esnatzeko ordua" (Kirmen Uribe), "Atertu arte itxaron" (Katixa Agirre), "Su zelaiak" (Mikel Peruarena), "Kristalezko begi bat" (Miren Agur Meabe), "Martutene" (Ramon Saizarbitoria)...
